Community Pabahay sa Barangay gisugdan sa 73rd IB

MALITA, Davao Occidental -- Gisugdan na sa mga sakop sa 73rd Infantry Battalion (IB) sa Philippine Army (PA) ang "Community Pabahay sa Barangay" pinaagi sa boluntaryong pag-trabaho sa mga benepisyaryo niini.

Ang mga sundalong sakop sa Charlie Company ilawom ni First Lieutenant Willie M. Laurente ang nangulo sa proyekto nga gihatag ni Governor

Claude Bautista alang sa mga wa'y kapuy-an sa mga lungsod sa Malita, Sta. Maria ug Don Marcelino.

Nasayran nga unang gihimo ang groundbreaking ceremony didto sa Barangay Mana ning lungsod ug Barangay Ogpao, sa Sta. Maria niadtong Disyembre 5, 2020.

Pipila ka mga napiling benepisyaryo ang makaangkon sa libreng balay nga gihatag sa gobernador.

Gihangop sab ni Bautista ang gipakitang "bayanihan" sa kasundalohan ug mga boluntaryong mitabang sa pagpabarog sa mga balay.

Tumong sa programa nga mahatagan og disenteng pinuy-anan ang mga nagkinahanglan og balay sa komunidad aron maalibyohan ang ilang kahimtang.

Samtang, gipaneguro ni Lieutenant Colonel Ronaldo Valdez, pamuno sa 73rd IB, nga pahugtan nila ang seguridad sa mga kabukiran aron magpabiling malinawon ang lugar ug layo sa hulga sa mga rebeldeng komunista ilabi pa nga nagkaduol ang anibersaryo sa Communist Party of the Philippines, ang tuong kamot sa New People's Army karong Sabado, Disyembre 26. (Orlando B. Dinoy)