STL teller gibugha

DIGOS CITY -- Wa na kaabti og Pasko ang usa ka teller sa Small Town Lottery (STL) human giluthang sa nag-inusarang mamumuno alas 6:45 sa gabii Lunes, Disyembre 21.

Nahitabo ang insidente didto sa Purok Fortune, sa dalang Roxas Extension, Barangay Tres de Mayo ning dakbayan.

Si Lieutenant Colonel Vici Anthony Tababa, hepe sa Digos City Police Station, nag-ila sa biktima nga si Melody Malubay Cañete, 40, minyo ug residente sa Chapter II, Barangay Aplaya.

Subay sa inisyal nga imbestigasyon sa kapolisan, nagbantay niadtong higayona ang biktima sa STL booth nga iyang gitrabahoan dihang kalit nibutho ang suspek ug wa'y daghang rason, namusil gamit ang kalibre .45 pistola.

Pipila ka mga nakasaksi sa krimen naghulagway sa suspek nga payaton, mga lima ka tiil ug pito ka pulgada ang gitas-on, nagsul-ob og kolor itom nga face mask ug puti nga t-shirt.

Ang biktima, naigo sa ulo, hinungdan nga diha-diha nakabsan sa kinabuhi.

Sa kasamtangan, padayon nga gi-imbestigahan sa kapolisan ang motibo sa krimen hayan mailhan ug masikop ang kriminal. (Orlando B. Dinoy)