GIPAILAWOM sa surprisang drug test ang mga personahe sa 2nd Davao del Sur Provincial Mobile Force Company (DSPMFC) adlaw'ng Martes, Disyembre 22.
Gipangunahan mismo sa ilang hepe nga si Major Rey Santillan ang pagtunol sa urine sample ngadto sa mga personahe sa Philippine National Police Crime Laboratory nga maoy misusi niini.
Gikanayon ni Major April Fabian, nagdumala sa aktibidad, nga kabahin ang drug test sa standard procedure sa kapulisan aron masayran kung duna bay mga personahe nga nagagamit sa ilegal nga druga.
Bisan ang 38 ka mga sakop sa Matanao Municipal Police Station ug non-uniformed personnel (NUP) niini na-surprisa sab sa gipahigayong drug test.
Hinuon sa dihang migawas ang resulta, way bisan usa ang nagpositibo sa paggamit sa ilegal nga druga.
Matud ni Captain Rhuel Barachina, hepe sa Matanao Municipal Police Station nga timailhan lamang kini nga seryuso ang ilang hut-ong sa hugot nga kampanya batok sa tanang matang sa druga ug nagbahad nga dili nila lung-an ang paggukod sa mga tawong padayon nga nagpayuhot niini. (Orlando B. Dinoy)