Nag-party, nagmamam nabulabog

Superbalita Davao file
Superbalita Davao file

GIHAN-AY na sa Talomo Police Station ang pagpasaka og kaso sa katorse ka mga empleyado sa City Hall sa Davao City human nangasikop kay sekretong nag-party ug nagtagay og ilimnong makahubog.

Subay sa report gikan sa Talomo police, sulod mismo sa Maa Motor Pool nag-party ug nag-inom ang mga nahisgutan alas 3:40 sa hapon, Martes, Disyembre 22, 2020.

Luyo sa panawagan ni Davao City Mayor Sara Duterte-Carpio nga likayan ug di magpahigayon og party, misupak gihapon ang mga nahisgutan ug nagtagay pa bisan dunay liquor ban ang siyudad.

Sa mga hulagway gikan sa Talomo police, makita nga dunay gipang-atubang nga mga ilimnong makahubog ang mga empleyado nga nakasuot pa og itom nga t-shirt nga dunay pahimangno batok Covid-19 nga giisyu sa local government unit (LGU) sa Davao.

Sumala ni Davao City Police Office (DCPO) Spokesperson Police Captain Rosario Aguilar nga pasakaan gyud og kaso didto sa korte ang mosupak sa balaod sa Inter-Agency Task Force ug sa mga executive order sa dakbayan.

Apan Miyerkules, pakyas ang Superbalita nga makuha ang tubag sa DCPO labot sa kalamboan sa nahitabo.

Luyo sa insidente, ang LGU-Davao pinaagi ni Davao City Mayor Sara Duterte-Carpio mipagula og pamahayag pinaagi sa press release sa City Information Office (CIO).

"A stern warning and reminder to all offices not to conduct parties. Heads of offices should remind their personnel every day to give honor (by following protocols) to their fellow employees who are hard at work on the Covid-19 frontlines," pamahayag sa mayor.

Gimandoan sab ni Mayor Sara ang Davao City Human Resource Management Office sa pagsubay unsa pa ang posibleng kaso nga atubangon sa katorse ka mga dinakpan, "check other penalties aside from liquor ban cases." (Uban sa taho sa CIO)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph