ATONG lili-on ang pipila sa mga Municipal Plaza sa Sugbo, uban sa ilang mga matahum nga series lights nga gidayandayan sa Kapaskohan nga maoy naghatag og kinabuhi sa kagabhion.
Kini dungan sa mga pasundayag sa ilang mga lamiang pagkaon, sama sa rosquillos ug masi sa lungsod sa Liloan.
Ang Belen, Parol ug ang Christmas Tree ang mga simbolo sa paglaum ug kalipay nga maoy mensahe ning maong balaanong selebrasyon dihang gihimugso sa Birheng Maria ang batang si Hesus sa pasungan aron luwason ang kalibutan gikan sa tino nga kaparutan sa lapok sa kasal-anan.
Hinaot kining maong mensahe maoy magpahinumdom kanato sa makausa pa sa tinuod nga diwa sa Pasko. Kay sama sa kagabhion duna say naghuwat kanato nga kahayag sa kabuntagon. Dili ta mawad-an og paglaum kay ang tanan lumalabay lamang. Bisan pa man sa gipatuman nga mga health protocol, usa ka Malipayong Pasko ug Luwas nga Bag-ong Tuig lang gihapon kanatong tanan.