MOABOT na sa 31 ka mga lungsod sa lalawigan sa Sugbo ang magsaulog sa Pasko nga way mga kaso sa coronavirus disease (Covid-19).
Kini maoy gipahibaw ni Dr. Christina Giango, pangu sa Integrated Provincial Health Office (Ipho) sa Disyembre 23.
Ang lalawigan sa Sugbo adunay 44 ka mga lungsod ug unom ka mga syudad.
Matod ni Giango nga sukad sa Nobiyembre hangtod sa Disyembre 22, napun-an og 10 ka mga lungsod ang natala nga gawasnon na sa sakit.
Nalakip sa listahan mao ang mga lungsod sa Alcoy, Alegria, Aloguinsan, Asturias, Badian, Bantayan, Barili, Boljoon, Borbon, Catmon, Daanbantayan, Dalaguete, Dumanjug, Ginatilan, Madridejos, Malabuyoc, Medellin, Moalboal, Oslob, Pilar, Poro, Samboan, San Fernando, San Francisco, Santa Fe, Santander, Sogod, Tabogon, Tuburan ug Tudela.
Samtang sa unom ka mga siyudad, ang Carcar pa lang ang wa nay kaso sa Covid.
Matod ni Giango nga nakatabang sa pagkunhod sa mga kaso ang padayon nga pag sunod sa mga Sugboanon sa probinsya sa health ug quarantine protocols.
“Kana ilang mga practices unya nagbantay na gyud sad ang mga tawo pod aron dili matakdan sa sakit...ang ila mo test sa symptomatic ug kadtong mga close contact. Mo-test man gihapon pero menos na lang ang cases, dili na parehas sa una,” matod ni Giango sa Superbalita Cebu sa Disyembre 23.
Subay sa uwahing datos sa lalawigan sa Disyembre 22, nakatala kini og 6,945 ka mga kompirmadong kaso sukad sa pagsulbong sa sakit sa nasud.
Sa maong gidaghanon, 6,456 na ang nakarecover, apan 411 na ang namatay sa Covid.
Sa kasamtangan aduna pa’y moabot nga 78 ka mga aktibong kaso ang gikombate sa mga lungsod sa Argao (10); Balamban (6); Consolacion (5); Sibonga (4); Minglanilla (3); San Remigio (3); Compostela (2); Liloan (2); Alcantara (1); Carmen (1); Cordova (1); Pinamungajan (1); Ronda (1); Tabuelan (1); dakbayan sa Talisay, (5); Danao (4); Naga (4); Bogo (3); Toledo (2) ug Cebu Provincial Detention and Rehabilitation Center (19).
Atol sa pagsaulog sa Pasko, gipahinumdoman ni Giango ang mga municipal ug city health Officers nga magmabinantayon, ipadayon ang surveillance ug monitoring sa kalungsoran subay sa pagpahinumdom sa mga residente sa importansya sa pag subay sa protocol.