SUPERBALITA CEBU

Barrita: Malipayong Pasko Kaninyong Tanan!

Tipik sa balaod

UNA sa tanan, Malipayong Pasko kaninyong tanan!

Dihay managkumpare nga naghisgot sa ilang pagsaulog sa Pasko. Ingon ani. Kumpare 1: “Pre, first time ni nga ang akong pamilya wa mag-Pasko sa Boracay tungod sa Covid-19.” Kumpare 2: “Sa unang mga Pasko, didto diay mo sa Boracay?” Kumpare 1: Wa, pero sa una di man to tungod sa Covid-19, tungod man to sa kapobre.”

Sa labing unang higayon, magsaulog kita sa Pasko, sa balaang adlaw nga natawhan ni Hesus, taliwa sa Covid-19 pandemic. Magsaulog gihapon kita kay way pandemic nga makapawong sa diwa sa Pasko.

Didto sa United Kingdom (UK), sama da nga kanselado ang Pasko, kay nimando si British Prime Minister Boris Johnson sa usa ka istrikto nga lockdown sa mga dagkong syudad sama sa London tungod sa pagsulbong pagbalik sa mga kaso sa Covid-19.

Lakip sa Pasko ang mga mabulukon nga dayan-dayan, mga Christmas trees ug mga parol nga dunay mga suga nga magkidlap-kidlap. Sa mga mga malls ug uban pa, makita ang mga Belen o Nativity scene nga anaa si Jesus sa pasungan ug naa sab si San Jose, Birhen Maria ug giyukboan sa tulo ka mga “wise men.”

Ang mga late night talk show hosts sa Estados Unidos miingon nga gidili ang Belen didto sa Washington D.C. di kay supak sa balaod apan tungod kay di silang kakita og usa ka birhen ug tulo ka wise men. Apan nahibawo ba mo nga bisan ang pagbutang og Belen nahimong kontrobersyal didto sa Amerika?

Niabot ang maong isyu sa US Supreme Court ug nisangpot sa desisyon sa kaso nga Lynch v. Donnelly, 465 U.S. 668 (1984) nga nag-ingon nga ang pagbutang sa Nativity scene sa usa ka government property wa makalapas sa establishment clause sa First Amendment sa US Constitution mahitungod sa kagawasan sa relihoyn.

Ang nahitabo mao ni. Ang syudad sa Pawtucket, Rhode Island, nahimong co-sponsor sa lokal nga mga magpapatigayon alang sa Christmas display didto sa ilang public park nga naglakip sa Nativity scene. Gisupak kini sa mga residente ug sa lokal nga pundok sa American Civil Liberties Union.

Gipasaka nila ang kaso sa district court nga nipabor nila. Ang desisyon gidasonan sa dihang gi-apelar sa Court of Appeals for the First Circuit. Gipasaka ang kaso sa US Supreme Court pinaagi sa certiorari ug gibali ang desisyon sa mga ubos nga hukmanan.

Si Chief Justice Warren E. Burger, nisuwat sa desisyon, niingon nga didto sa Estados Unidos, giila sa gobyerno ang Pasko ug Thanksgiving nga mga national holidays ug gigastohan pa gani ang maong mga holidays nga dunay religious significance. Matod ni Burger, ang maong mga tradisyon lahi sa gidili sa First Amendment nga magtukod ang gobyerno og usa ka relihiyon.

Way nikuwestyon sa pagbutang og mga Belen sa mga parks ug building sa gobyerno dinhi sa Pilipinas, tingali tungod kay mayoriya man ang mga Kristiyano. Dunay mikuwestyon sa paggamit sa usa ka lugar sa usa ka Hall of Justice alang sa misa sa Katoliko apan ang atong Korte Suprema miingon nga wa kini makalapas sa Konstitusyon. (edbarrita@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph