GIBALITA kagahapon (samtang nagsulat ako niining maong lindog) nga gibalik sa kagamhanan sa Cebu City ang quarantine pass.
Wa man koy pagsupak niining quarantine pass. Makahimuot lang hunahunaon. Tanang mga tawo nga akong nakit-an diri sa Ayala Commercial Center way gikwentas nga Qpass. Kinsa man say gusto mosul-ob og Qpass nga usa ka bond paper ang kadak-on? Mao sab kiniy Qpass nga pangilad. Dunay QR code nga fake.
Mahimuot sab ko nga mangusog na sab ang atong kapulisan, kana kon motuo sila sa mando ni Mayor Edgar Labella, nga manakop na sab kon walay dalang Qpass.
Naglibog ko sa panghunahuna sa mayor. Naa man kiniy mga tigtambag nga mga doctor. Nagtuo siya nga mahadlok ang coronavirus niining iyang Qpass? Di ba, mas maayo kon striktuhon ang paggamit og face mask ug saktong pagsul-ob sa face shield?
Nakaingon ko nga gikinahanglan striktuhon ang saktong paggamit sa face shield kay kasagaran sa akong masugatan, di man ang nawong ang protektahan. Ang agtang man. Hahaha!
Ayaw na anang pagbalik sa Qpass mayor. Igo ra kang mahimong kataw-anan. Di mahadlok ang Covid-19 sa imong QPass.
Aksidente
Nakatabang ang PRWorks sa mga press release sa Carmen Copper Corp. kaniadtong si anhing Gina Lopez pa ang environment secretary. Ang Carmen Copper Corp. mao ang kanhi Atlas Consolidated Mining and Development Corp.
Niadtong tungora, kumbinsido ko sa mga environmental measures sa maong kompanya. Gani, nakapasar kini sa striktong standards ni Lopez.
Wala na kami malambigit sa Carmen Copper dihang si Secretary Cimatu na ang hepe sa DENR. Apan nibilib man sab ko sa maong kanhi heneral dihang nakasud-ong ko kaniya kadtong panahon sa landslide sa Siyudad sa Naga ug karong tuiga dihang siya ang niagak sa mga opisyal sa Syudad sa Sugbo nga, may bulan, nahimong number one sa mga kaso Covid-19.
Mao nga nakalitan ko sa balita bahin sa landslide diha sa Carmen Pit sa miaging Disyembre 22 nga niresulta sa kamatayon sa upat ka mga minero samtang unom ang missing. Gituohan nga apil kini sila sa nalubong dihang nidahili ang yuta tungod sa grabing pag-ulan bunga sa bagyong Vicky.
Sakit palandungon nga nahitabo kini dihang nag-angat na ang Pasko. Usa sa namatay amahan sa empleyado sa Naga City Hall.
Ang maong minahan maayo baya og safety record sukad niabli pag-usab sa miaging 2007 ubos sa Carmen Copper Corp. Kining maong hitabo angay mopugos kanato sa pagplano og alternatibo kabahin sa atong mga minahan. Pananglitan, mas dako man ang maginansya kon kitang mga Pinoy mismo ang moproseso sa copper kay sa ibaligya nato sa gawas isip raw material. (@anol_cebu sa Twitter)