ISIP resulta sa brutal nga pagpusil patay sa usa ka pulis sa inahan ug anak sa Paniqui, Tarlac nidtong miaging semana nga nag-viral sa social media ang video, mipahimangno si PNP chief Debold Sinas sa publiko nga dili magpataka og kuha’g video sa krimen kay peligro sa crime scene ug posible nga ma-tamper ang video. Kon ang kapiligro hisgutan, may punto si Sinas kay basin og unahon og pusil o patay ang magkuha.
Apan kon makatabang ba ang video sa pagsulbad sa usa ka krimen, dako kaayo. Ang video lig-o kaayo nga ebedensiya kay dili man kini mamakak gawas kon i-tamper. Nganong ato man gi-encourage nga magbutang og CCTV camera ang mga opisina, panimalay ug mga establisamento?Dash-cam sa atong mga sakyanan ug body camera ang atong kapulisan?
Dili makapakgang ang camera sa pagkomiter sa usa ka krimen apan makatabang og dako sa post-crime solution labi pa ang pag-ila sa suspek o mga suspetsado kon makuha sa camera. Daghang mga krimen ang nahatagan og kasulbaran gumikan sa video. Sumala nganong na-ilhan man ug nadakpan sa National Bureau of Investigation (NBI) ang usa sa mga mamumuno ni Atty. Joey Luis Wee? Gumikan sa CCTV footage. Ang mokuha aron dili mamiligro ang kinabuhi sama sa kabalaka ni Sinas, magbantay lang gyud.
Gina-ingon nga ‘Wisemen speak because they have something to say and fools because they too say something.’ Ingon niini karon anģ nahitabo sa new media. Ang tanan nahatagan og higayon nga makapadayag sa bisan unsa. Samtang dakong tabang ang labihan ka gawasnon nga social media apan ang naghinobra niyang pagkagawasnon mao ra usab ang mi-unay pagyatak sa kagawasan. Nahimong chopsuey o halo-halo na ang tanan diha sa social media.
Anaa ang matarong ug anaa ang hiwi. Anaa ang itum og anaa ang puti.Anaa ang tinuod ug anaa usab ang lunsay’ng mga bakak.
Anaa ang mga Diyosnon ug yawan-on. Anaa ang mga maalamon ug anaa usab ang mga yabag.
Apan ang lintunganay niini mao kon gi-unsa nato siya sa pagamit. Kana maoy labing mahinungdanon. (bobbygnalzaro@gmail.com)