Ang Metro Cebu makapaabot og katag nga mga pag-uwan karong adlawa, Dominggo, Disyembre 27, 2020 tungod sa duha ka low pressure areas nga ningsulod sa Philippine Area of Responsibility (PAR) sa Sabado sa buntag, Disyembre 26.
Si Al Quiblat, pangu sa Philippine Atmospheric Geophysical and Astronomical Services Administration (Pagasa)-Mactan station, niingon nga mapanganuron sa Metro Cebu sa Dominggo.
Iyang giawhag ang publiko nga magmabinantayon sa posibleng landslides dala sa uwan ingon man flashfloods.
Ang unang LPA nga gibantayan sa Pagasa nisulod sa PAR mga alas 8 sa buntag sa Sabado.
Mga alas 10 sa buntag sa Sabado, naa kini sa 50 kilometros sa silingan habagatang silangan sa Zamboanga City.
Samtang laing LPA ang naporma sa silangan sa Kabisay-an sa alas 8 sa buntag sa Sabado. Sa alas 10 sa buntag, naa kini sa 315 kilometros sa silangan sa Guian, Eastern Samar.
Matod hinuon ni Quiblat nga kuli nga mahimong bagyo ang duha ka mga LPA sa mosunod nga 24 oras. (WBS)