MOABOT 2,000 ka mga indibidwal o 400 ka mga households sa dakbayan sa Toledo nga nagpuyo 500 metros gikan sa nahitaboan sa landslide sa Carmen Copper Corporation mobalhin na sa gitagana nga temporaryong evacuation center.
Kini maoy gipahibaw ni Roseller Layan, information officer sa Kagamhanan sa Dakbayan sa Toledo sa interbyu sa Superbalita Cebu.
Kini gimando ni Toledo City Mayor Marjorie Perales subay sa nakitang nagkadako nga liki sa yuta dapit sa open pit ug risgo sa mga residente duol sa nahitaboan.
Si Layan nagkanayon nga “nag umpisa ng mag set up sa center at mga help desks po.”
Ang liki nakita sa Mines and Geosciences Bureau (MGB) dihang nibisita niadtong Martes sa buntag, Disyembre 22, 2020.
Ang liki nga nabantayan nag-anam og kadako hinungdan nga girekomendar ang pagpabalhin sa mga nagpuyo sa duol nga nahisakop sa Barangay Biga, Toledo City.
Hinuon, gipahibawo ni Layan nga wa nay nakitang dugang nga pagpangliki sa yuta.
SEARCH AND RETRIEVAL
Human sa lima na ka adlaw nga pagpangita sa unom ka mga missing, gisugdan na sa City Disaster Risk Reduction and Management Office (CDRRMO) ang search and retrieval operation.
Matod ni Layan nga sa Dsiyembre 26, wa pay nadugang sa mga naugkat nga lawas.
“..Nag resume ang search and retrieval but wala pang additional na retrieve po,” matod ni Layan.
Gisuwayan pagkuha sa Superbalita Cebu ang habig sa CDRRMO alang sa dugang kalamboan sa ground zero, apan nagpadayon pa ang retrieval sa lugar.
Subay sa labing uwahing tala sa mga nangamatay sa landslide, anaa na sa upat samtang unom ang missing.
Ang mga namatay mao sila si Junil S. Lagola, Ernesto G. Caspe, Juan M. Tapang, ug Dionisio Labang.
Samtang padayong gipangita mao sila si Jose B. Carpentero, Jonwel S. Herediano, Simeon B. Laconas, John Paul L. Resuelo, Renante F. Sepada, and Alfred C. Tautho.
Ang Carmen Copper Corporation (CCC) ni adapt na usab sa bag-ong mga pamaagi aron mas daling makit-an ang mga lawas sama sa pagpalupad ug drone ug uban pa.
Nidahili ang yuta sa minahan sa CCC sa alas 4 pasado sa hapon sa Disyembre 21.
Gibasol sa kompaniya ang grabeng mga uwan sa nanglabay nga mga semana ug ang labiwang uwahi, bagyong Vicky.