BISAN Pasko wa makapugong sa usa ka lab-asero sa paghikog pinaagi sa paglayat sa unang Mandaue-Mactan Bridge sa alas 5:25 sa hapon sa Disyembre 25,2020.
Giila ang biktima nga si Jopit Añana Ballentos, 30, ltaga 72B, Katipunan St., Barangay Labangon, Cebu City.
Matod ni Police Staff Sergeant Lexter Alvario, desk officer sa Presinto 3 sa Lapu-Lapu City Police Office (LCPO), usa ka motorista nakakita kang Ballentos nga nikatkat sa railing sa taytayan ug midiretso sa paglayat.
Dali siyang nisumbong ngadto sa Lapu-Lapu City Police Office ug girespondehan dayon sa kapulisan.
Matod ni Alvario nga ilang nakaplagan sa dagat nga patay na si Ballentos, kinsa wa pa nila mailhi kay way bisan usang dokumento nga dala.
Sa Sabado, Disyembre 26, 2020 alas 10:40 sa buntag, nailhan na kini nila human ang igsuon nga si Rachel Ballentos-Prado, taga Barangay Maribago, Lapu-Lapu City, niadto sa Lapu-Lapu City Hospital diin gidala ang lawas ni Ballentos.
Matod ni Alvario nga nahibaw-an ni Prado nga si Ballentos nilayat human nakita ang balita nga gi-post sa Facebook ug ilhanan nga adunay patik.
Sa imbestigasyon sa kapulisan, si Prado nisulti kanila nga si Ballentos miduaw sa iyang balay alas 3 sa hapon sa Disyembre 25.
Apan ilang nabantayan nga ingon sa dunay gikahadlukan ug dali rang nibiya sakay sa usa ka pick-up truck.
Wa mohatag og detalye si Prado kon kinsay tag-iya sa truck.
Tungod niini, gisundan nila si Ballentos apan layo na og naabtan ug wa na nila nasundan.
Sunod na lang nga nahibaw-an ni Prado sa Facebook mao nga adunay lalake nga milayat sa bridge nga nagsul-ob sa susama sa gisul-ob sa iyang igsuon dihang nibisita sa ilang balay.
Matod ni Alvario nga way laing detalye nga giibutyag si Prado sa rason ni Ballentos sa paghunos sa iyang kinabuhi.
Gani, padayon pa ang imbestigasyon sa kapulisan sa hinungdan.