Pinakamahal nga kahoy sa kalibutan naharang

MOBALOR sa P62 milyon ang kantidad sa kontrabando sa pinakamahal nga kahoy sa kalibutan ang nasakmit sa mga personahe sa Office for Transportation Security (OTS) ubos sa Department of Transportation (DOTr) sa Davao Airport Disyembre 24, 2020, dihang ipalupad na unta kini padung sa Kaulohang Manila.

Sa pagdiskubre sa OTS ila dayon nga gihandos ang pagkustodiya sa kontrabando sa Bureau of Customs (BOC)-Port of Davao, Davao International Airport (DIA)- Environmental Protection and Compliance Division.

Nasakmit ang kontrabando sa gipakusgan nga seguridad sa koordinasyon sa nagkadaiyang unit sa otoridad nga gilangkuban sa BOC, DIA, Ninoy Aquino International Airport (Naia), PNP Aviation Security Group ug Department of Environment and Natural Resources (DENR) Davao Region.

Unom ka mga karton sa Agarwood ang nasakmit nga hugtanon kining gibawal ang pagputol ug pagtumod nga anaa sa listahan sa National List of Threatened Philippine Plants per DENR Administrative Order No. 2007-01.

Sa inisyal nga report, ang nasampit nga kontrabando dalhon sa nasud Vietnam ug ipaagi sa Naia diin gideklara lamang sa package niini nga dunay sud nga woodcrafts apan human sa x-ray scanning ug physical inspection, positibo nga Agarwood chips nga motimbang sa 73-kilos nga walay igong dokumento.

Ang nasakmit nga package ipaubos sa seizure and forfeiture proceedings alang sa kalapasan sa Section 117 (Regulated Shipments), Section 1400 (Misdeclaration) and Section 1113 (Property Subject to Seizure and Forfeiture), ug sa Republic Act No. 10863 (CMTA) in relation to Section 27 (i) [Illegal Transport] sa Republic Act No. 9147 (Wild Life Act), diin ang maong kontrabando giintrigo sa DENR.

Kahinumdoman nga sa samang port cargo area, nasakmit sab ang P1.7 milyon nga kantidad sa maong kahoy niadtong Disyembre 14, 2020, nga maoy resulta sa gipakusgan nga Port’s intensified look-out uban sa koordinasyon sa BOC-Naia nga gipangunahan sa District Collector, Carmelita Talusan ug sa mga partner enforcement agencies niini.

Sa kasamtangan, ginaimbestigahan na sa otoridad ang nagdala niini, aron posibleng papanubagon sa maong kalapasan. Jeepy P. Compio