MIKATAG karon sa social media ang mga hulagway sa usa ka lalaki nga nagpakita sa iyang likod nga dunay daghang bun-og nga daw inagian sa bala sa airsoft gun ug sa iyang tiil nga dunay paso sa tambutso.
Dominggo sa buntag, Disiyembre 27, 2020, migula ang hulagway sa post sa usa ka Jean (basagon gitago) kinsa nagpailang siya ang igsuon sa biktima nga ginganlan sa iyang post.
Sumala niya sa iyang kapsyon sa mga piktyur, “Mao ni nahitabo sa akong manghod kagabie nga si edzer (bansagon gitago) taga kasilak bucana..nagpalit ra sya og balot para sa iyang mga anak... isa nasab akong manghod ang nabiktima sa AIR SOFT GANG.. gibunal bunalan sya gisipa iyang motor mao natumba og giarsa sya gipasoan sya og tambutso... dili na makatao ilang gibuhat sa akoang manghod...”
Gisulayan og kuha sa Superbalita Davao pinaagi sa telepono ang bahin ni Barangay 76-A Kapitan Rolando Trajera labot sa kalamboan sa ilang imbestigasyon sa maong taho, apan wala pa kini mitubag.
Sa bahin usab sa Davao City Police Office (DCPO) labot sa ilang follow-up sa maong hitabo, wala pa sab gitubag ni Police Captian Rosario Aguilar ang pangutana sa Superbalita Davao sukad alas 3:14 sa Dominggo sa hapon.
Subay sa impormasyon gikan sa kasaligan nga impormante, nahadlok sila sa hitabo nga ilang nasaksihan, Sabado sa gabii.
Sa miaging mga bulan, natigayon sab sa samang barangay ang pagbahis-bahis sa mga naka-motorsiklo kinsa nanglatos og latigo ngadto sa mga menor de edad mga naglatagaw pa sa gawas sa balay panahon sa des-oras sa kagabhion.
Sumala sa mga residente nga kon gang kini nga hinimoan, kinahanglan gayod nga aksyonan dayon sa barangay aron ma-report dayon sa kapulisan.