NAPILI nga Associated Press (AP) Male Athlete of the Year si Lebron James sa Los Angeles Lakers sa ikaupat nga higayon niadtong Dominggo (PH Time).

Ang ikaupat nga daog ni James sa AP Male Athlete of the Year award nakatabla sa nakab-ot ni cyclist Lance Armstrong ug legendary golfer Tiger Woods.

Si James maoy nangulo sa Lakers ngadto sa kampeyonato sa NBA bubble season didto sa Orlando. Gilupig sa Lakers ang Miami Heat, 4-2, sa Game 6 sa ilang best-of-seven champion series aron daogon ang ika-17 nga titulo sa franchise.

Ang maong titulo mao ang ikaupat ni James sulod sa iyang 17 ka tuig sa NBA. Si James midaog og duha ka kampeyonato ubos sa Miami Heat niadtong 2012 ug 2013, usa sa Cleveland Cavaliers niadtong tuig 2016 ug dugang usa sa Lakers.

Ang 35-anyos nga si Lebron mao ang unang NBA player nga midaog og NBA Finals MVP sa tulo ka managlahi nga franchise.

Matod ni James nga iyang gihatag ang iyang tanan makaya alang sa basketball.

“And I want to continue to inspire people with the way I play the game of basketball. But there’s so many more things that I can do off the floor to help cultivate people, inspire people, bring people together, empower them,” saysay ni James sa AP.

Si James nakakuha’g 78 puntos sa panel voting nga naglangkob sa 35 ka AP customers ug editors. Ang Kansas City quarterback ug reigning Super Bowl MP Patrick Mahomes ana sa ikaduha nga pwesto nga adunay 71 puntos.

Si James mao pud ang AP Male Athlete of the Year niadtong tuig 2013, 2016 ug 2018. Siya lang ang basketball player nga midaog sa maong award sa ika-upat nga higayon.

“He’s one of the greatest leaders in sports,” matod ni Kyle Kuzma, ang teammate ni James sa Lakers.

Dugang ni Lakers head coach Frank Vogel nga si James mao ang usa sa mga greatest players nga iyang nakita.

Ang AP Female Athlete of the Year i-anunsiyo karong adlawa.