KUMUSTA ang Pasko ning panahon sa pandemiya? Matod sa uban dako kaayo ang kalainan itandi sa nangaging katuigan. Krisis sa panginabuhi nahiagoman wala pay labot sa mga kabalaka ug kahingawa nga matakdan sa makamatay nga virus. Mao ni sagad nga rason ang madunggan nganong ang Pasko rong tuiga gihulagway nga lahi kaayo kon itandi sa Paskong nanglabay. Dili ni malalis.
Daghan ang nagbangutan sa tibuok kalibutan sa kalit nga pagtaliwan sa mga minahal sa kinabuhi nga nataptan sa Covid-19. Apan ang Covid-19 wala makapugong nga sa bisan unsang paagi nga ang tradisyonal nga paghandum sa pagka tawo sa Batang Hesus saulogon sa atong tagsatagsa ka panimalay. Kulang man sa preparasyon tungod sa budget, apan ang diwa sa Pasko dakong buhi diha sa atong tagsatagsa ka panimalay.
* * *
Siguro duna pay daghan ang nagpaabot sa ilang mga pinaskuhan. Apan nahibalo ba mo nga may Santa Claus nga wala magpaila ang nanghatag og pinaskuhan bisan wala pa ang Pasko? Ang nakanindot kay ang pinaskuhan nga iyang gihatag wala gyud manginahanglan og bawos. Ang gikinahanglan ra gyud mao ang pagpasalamat ug pagpaambit og mga maayong gawi ngadto sa uban. Ang wala magpaila nga Santa Claus dili sab mamili og tagaan.
Mao nga kon wala pa moabot ang pinaskuhan gikan sa mga tawo nga imong gilaoman nga manghatag, ayaw kaguol. Ikaw, ako, kitang tanan humana makadawat sa pinaskuhan ni Santa Claus nga di magpaila. Kon sa mga kasakit nga imong nahiaguman padayon kang nagpakabuhi. Sa ka daghang problemang pinansiyal nga naghasol nimo, apan imo kining nasungasong. Dili ba ni maisip nga usa ka talagsaong gasa nga mahimo sab nga isipon nga dakong pinaskuhan ning Pasko nga gisaulog ta.
Sa laktod, ang padayon natong pagginhawa, pagmata sa buntag, paghanggap og hangin, pagpadayon sa mga gimbuhaton sa balay ug trabahoan, usa ka bililhon nga pinaskuhan nga dili matupngan. Gawas sa pagpasalamat sa naghatag niini, gilaoman kita nga mopaambit niini sa uban pinaagi sa gugma nga maoy hinungdan nganong padayon kitang may pinaskuhan bisan dili Pasko.