GIKABALAK-AN karon ang pagtumaw didto sa Great Britain sa usa ka bag-o ug mas grabe ka mananakod nga Covid strain. Si British Prime Minister Boris Johnson nimando sa usa ka mas istrikto nga lockdown kay ang bag-ong matang sa Covid giingon nga 70 porsiyento ka mas manakod kay sa unang Covid-19.
Daghang mga nasod nga nipatuman og travel ban sa United Kingdon (UK) of Great Britain lakip sa Canada, Italy, Turkey, Switzerland ug Germany aron di sila masudlan sa bag-ong Covid nga giingong nakasud na sa Singapore.
Gisuspenso usab sa Pilipinas ang flights gikan sa UK sugod sa Disyembre 24 hangtod sa 31.
* * *
Daghang mga ginikanan ang nabalaka sa pagtugot ni Presidente Rodrigo Duterte sa pilot implementation sa face-to-face classes sa mga eskuylahan kay wa pa mawagtang sa hingpit ang Covid-19 ug magbutang kini sa peligro sa kinabuhi sa kabataan.
Apan tungod sa pagtumaw sa bag-ong Covid strain didto sa UK, gibakwi sa presidente ang maong mando. Sa ato pa, wa nay pilot implementation o bisan sa pagsuway na lang sa face-to-face classes sa piniling mga lugar sa nasod gikan unta sa Enero 11 hangtod sa 23.
Magpadayon gihapon ang pagpatuman sa distance learning, ang kombinasyon sa online ug modular learning, nga gisugdan sa pagbukas sa klase niadtong Oktubre 5 sukad sa pagsira sa mga eskuylahan tungod sa Covid-19 pandemic.
* * *
Si Presidente Duterte namahayag niadtong Sabado nga dako ang posibilidad nga ibalik ang pagpatuman sa mga lockdown kon ang bag-ong Covid strain gikan sa UK makasud ug mokatap sa Pilipinas, depende sa gidaghanon sa matakdan.
Duna nay mga epektibong bakuna batok sa nag-una nga matang sa Covid-19. Nakabakuna na sila sa labing daling takdan didto sa UK ug sa Estados Unidos ug sa ubang mga nasod sa Uropa.
Ang Pilipinas nakigsabot-sabot pa lang sa vaccine manufacturers aron mopalit sa bakuna. Wa pa gani moabot ang bakuna nato, gihulga na ta sa bag-ong klase sa Covid. Mag-amping na lang ta. Matod pa bitaw, “Safety brings first aid to the uninjured.”