Mga EOs sa Covid-19 sa Davao, gilugwayan

GIPAKLARO ni Mayor Sara Duterte-Carpio nga ang mga executive orders (EOs) nga mapupos na o kutob na lang sa Disyembre 31, 2020, lugwayan pa hangtud sa sunod tuig, sugod Enero 2021.

Ang pagtin-aw nahitabo atol sa paghinabi kang Duterte-Carpio sa 87.5 FM Davao City Disaster Radio kagahapon sa hapon, Disyembre 28, human daghan ang nagpangutana kon epektibo pa ba ang nahisgutang mga EOs nga mapupos na ning katapusan sa tuig 2020.

"Mao gihapon sila (EOs) ang atong sundon pag-abot og January. We are trying to be consistent...di nato ginabag-o-bag-o ang atong mga regulations and protocols na para di ma-confused ang mga tao," pagtataw sa mayor.

Mga nahisgutan mao ang EO-55 nga nagmando sa pagpatuman sa curfew hours gikan alas 9 sa gabii hangtud alas 4 sa kaadlawon ug pagpakubos sa uban pang mga aktibidad; EO-56 nga nagmando sa pagsagop sa uban pang alternatibo nga pamaagi sa pagtrabaho, pampubliko man o sa pribadong mga buhatan; EO-57 nga nagmando sa pagpakubos sa panagtapok o mass gatherings ug magdili sa mga biyahe nga di importante o essential sulod sa siyudad sa Davao ug uban pang mga tumong; ug ang EO-59 nga nagmando sa pagbalik og imposar sa 24-oras nga liquor ban sa siyudad sa Davao nga miepekto niadtong Nobyembre 2, 2020 hangtud Disyembre 31, 2020.

Hinuon, gisulti sa mayor nga magmugna pa siya og EO aron ang mga nahisgutang kamandoan lugwayan hangtud sa sunod tuig.

Tumong sa paglugway niini aron nga ang katawhan sa siyudad di na malibog kon unsang regulasyon ug protocols sa siyudad ang subayon ilabi na sa sunod tuig 2021.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph