DILI pa gyud diay ni mahuman ang atong kalbaryo sa 2021 kay duna na man sad kunoy bag-ong coronavirus strain ang nakit-an sa United Kingdom nga mas paspas pang manakod kaysa Covid-19.
Daghan sa mga nasud karon ang nanirado na og balik sa ilang mga border sa kahadlok. Bisan dinhi sa Pilipinas gi-ban una ang tanang flight nga gikan sa U.K.
Mao nga sa karon nga Bag-ong Tuig mas maayong simple lang una ang selebrasyon ug di sa magpalabi og gasto kay wala pa ta kahibawo kon unsa na say epekto ani sa atong ekonomiya.
Ambot bitaw di ba kaha kita ray giilad ani. Siyempre aron motaas ang demand sa ilang vaccines. Kay kon wa nay Covid kinsa pa may mopalit sa ilang vaccine.
Ang nakaparat pa nga duna man untay barato ug mas epektibo ari gyud sila sa mahal ug wa pa gyuy siguro kon kasaligan ba. Hahaay. China vaccines pa more!
“FAN GIRL”
Nanghakot gabii ang “Fan Girl” sa 46th Metro Manila Film Festival Awards Night diin lakip sa gipasidunggan ang newcomer nga si Charlie Dizon isip Best Actress nga maoy nidala sa title role.
Una ni siyang nahatagan og break dihang nidala siya sa papel nga Marikit sa fantaseryeng “Bagani” sa ABS-CBN niadtong 2018. Bisan niadto pa maayo na gyud ni siya. It’s a well deserved award.
JANINE GUTIERREZ
Maayo kaayo kon tinuod man gani nga mobalhin na si Janine Gutierrez sa ABS-CBN. Dugay na kuno ning damgo ni Janine nga mahimong Kapamilya star.
Giingong niaslom ang relasyon sa aktres sa iyang home studio tungod sa iyang negatibong komento sa pagbalik-telebisyon ni Senador Bong Revilla sa GMA.
Dili angay mahadlok si Janine kay sooner or later makabalik ra man gyud ni ang ABS-CBN ug sigurado ko di siya pasagdan sa ABS-CBN kon mahitabo.
DAGHANG SALAMAT
Niadtong bisperas sa Pasko wa damhang nakadawat kog tawag sa telepono gikan sa award-winning composer nga si Roland Amila nga tua na nagbase sa Pilar, Bohol.
Sila diay kaubana nanganta ni Jerome Sala sa Misa del Gallo sa ilang simbahan. Si Jerome Sala mao sad ni siyay grand champion sa Star in a Million Season 1 sa ABS-CBN niadtong 2005. Daghan kaayong salamat,`Lan, sa pinaskohan. Maajong pagsaulog ninyo diha.
Katapusang Martes karon sa 2020 ug tulo na lang ka adlaw bag-ong tuig na. Hinaot mabalik na sa normal ang tanan sa 2021. Maluoy ang Ginoo. Ug kay nibasa man ka sa atong Tagming, ming, ming! HAPPY NEW YEAR!!!