NAKURAT ko sa balita nga nabakunahan na diay ang mga sundawo ug ang mga sakop sa Cabinet ni Presidente Rodrigo Duterte. Samtang gipatuo kita nga sunod tuig pa moabot ang supply sa bakuna sa Covid-19, naa na man diay nag-una.
Nakurat pa gyud ko sa hulga sa Presidente nga iyang i-abrogate ang Visiting Forces Agreement (VFA) kon di mohatag ang Estados Unidos og 20 milyones ka dose sa bakuna. Naniguro na si Duterte nga masuko ang mga Amerikano ug ang sa China na lang ta molaom?
Makaguol baya gyud kining Sinovac, nga dunay dakong order ang Pilipinas. Matod pa, mao kini ang labing mahal sa mga bakuna. Dayon, kapin lang sa 50% ang ka-epektibo niini?
Wa gyud ko makalimot baya nga nasuko ang Presidente nga gisaway nga walay plano sa pagbatok sa Covid-19 dihang nipahigayon siya sa iyang State of the Nation Address (Sona). Giklaro niya paglabay sa usa ka semana nga ang plano sa iyang administrasyon mao ang bakuna.
Apan dihang nabalita nga nag-apod-apod na ang ubang mga nasud, nagsigi pa og negosasyon ang Pilipinas. Karong bag-o, nasayran nga ang atong mga sundawo ug mga sakop sa Cabinet nagpabakuna na.
Unsa diay kini? Special ang mga sundawo ug ang tiguls nga mga opisyal? Nakakuha sila og espesyal nga supply?
Nagkanayon ra ba si Spox Harry Roque nga pasagdan na lang kuno nga giuna ang mga sundawo kay sila ang nagdepensa sa atong nasud.
Buot ipasabot ba day Harry nga di na kita mangutana kon giunsa pag-abot sa maong mga bakuna? Kinsay nibayad sa maong mga bakuna? Basta dawaton na lang? Ug nganong naapil ang mga sakop sa Cabinet?
Naunsa na man kining atong liderato? Bale wala na man lang ang kredibilidad? Naghisgot ra ba og laing lockdown tungod sa bag-ong strain sa coronavirus. Apan unya na kuno manirado ang Pilipinas kon duna nay ebidensya nga niabot sa Pilipinas.