MALIPAY ta nga 55 sa 80 ka mga barangay sa dakbayan sa Sugbo gideklarar na nga libre sa Covid-19. Angay natong pasalamatan ang katawhan sa pagtuman sa mga lagda sa minimum health protocol ingon man sa atong Ginoong Diyos nga makagagahum nga gilikay ta sa dakong kadaut sa corona virus. Apan dunay 25 pa ka barangay nga naigo pa sa virus.
Wa ginganlan ang 55 ka mga barangay kay, matod pa sa mga opisyal, basin og mogara ang mga residente kon makahibawo nga luwas na ang ilang barangay sa Covid-19 unya di na hinuon mosul-ob sa mask ug face shield. Di paghadlok, apan dili pa angay nga mokumpiyansa ang katawhan kay, matod pa sa siyensya, 14 pa ka adlaw usa mahibaw-an kon natakdan ba ang tawo sa virus.
Sa atong pagsaulog sa Pasko, daghan gihapon ang nagpundok tungod sa atong tradisyon nga kinahanglan nga mag-abot ang mga sakop sa pamilya sa atong pagsugat sa Disyembre 25. Sa ato pa, ang 14 ka adlaw adto pa sa Enero 8. Mangaliya ta nga magpadayon ang pagkunhod sa kaso sa Covid-19.
Ang atong nasudnong kagamhanan giabot og kabalaka sa bag-o nga strain o kagaw sa Covid-19 nga, matod pa, mas delikado kay paspas ang pagtakod didto sa England nga miabot na sa Singapore. Gani, ang mga biyahe gikan sa UK di na makasulod sa atong nasud ingon man sa uban.
Usa sa gihatagan og bili sa giingon nga pag-ubos sa takod sa Covid-19 sa dakbayan sa Sugbo mao ang paghatag og premyo nga P100,000 matag barangay nga makapaminos sa kaso sa Covid-19 gikan sa Nobiyembre 1 hangtod sa katapusan sa Disyembre.
Ang paghatag og insentibo aron lang kita motuman sa mga lagda o balaod dili dautan apan mogawas nga tapulan na kitang mga katawhan kay motuman lang kon dunay premyo. Sama sa krimen nga mohatag ang kagamhanan og premyo aron mogawas ang nakakita sa paghitabo sa krimen. Kon way ikahatag ang kagamhanan nga premyo ang posible nga mahitabo way motestigos.
Ang premyo nga P100,000 matag barangay nakatabang og paminos sa takod? Unsay gibuhat sa mga opisyal sa barangay aron makadawat sa maong premyo? Ila ba nga ipakita ni Cebu City Mayor Edgar Labella nga daghan sila og nadakpan nga wala motuman sa pagsul-ob sa mask ug face shield ug pagdala sa Q-pass?
Diri sa among dapit, daghan ang mga tawo nga wala motuman sa pagsul-ob og mask ug face shield kon naa sa publiko sama sa tindahan o tiyangge. Gani, naay daghan magpundok-tabi nga walay mga mask. Kon duna man gani, naa ra sa suwang ang mask.
Ang mga tawo sa lungsod sa Consolacion morag wa nay kahadlok sa Covid-19. Daghan ang naglakaw-lakaw, nga walay mask nga misulod sa mga tindahan sa pagkaon og mga sapot. Nagpakita lang ni nga kumpiyansa na kaayo ang kagamhanan sa Consolacion bisan pa sa taho nga dunay bag-o nga kagaw nga miigo sa UK.
Happy New Year!