GUMIKAN ning bag-ong strain o klase sa coronavirus nga miigo karon sa United Kingdom ug posible mokatap sa ubang kanasuran, nahukman ni Presidente Rodrigo Duterte nga dili na ihinayon ang pilot o experiment sa face-to-face classes karong Enero sa pipila ka mga piniling lugar. Mas kuyaw pa kuno kining maong virus kay sa nauna. Dali pa gani kini motakod. Kuyaw og makasulod dinhi sa nasud.
Gani, gidili na ang pagdawat og flights sa eroplano gikan sa UK paingon diri sa nasud. Hinuon, wala pay natala o nadiskobre nga kaso niini dinhi sa nasud. Sa Singapore, Japan ug Hong Kong anaa na. Mas maayong iapil pod ang pag-ban o pagdili sa mga direktang flights ning maong mga nasud aron makasiguro ta.
Ambot, wala gyud ko makasabot aning baruganan sa mga opisyal sa Department of Education (DepEd) nganong moinsister man sila nga magpahigayon og face-to-face classes karong sunod buwan sa mga lugar nga wala o minus ang kaso sa Covid 19. Gusto gyud nilang isugal ug ipasubo ang kinabuhi sa kabataan?
Niadto lang Hunyo nga maisugong nipadayag si Presidente Duterte nga dili siya makatugot nga ipahigayon ang physical classes kon walay bakuna nga madiskobre batok sa Covid 19. Apan karon nga tangkod nga unom na ka buwan human niya gipadayag ang iyang baruganan, nausab na man ang huyop sa hangin.
Nisugot na unta siyang mag-face-to-face classes sa sunod tuig gumikan sa kanunay’ng pag-insister sa taga DepEd. Hinuon, pilot o eksperimento lamang kini. Apan nunot ning maong kalambuan, nadisisyonan sa Presidente nga i-kanselar na lang gyud. Maayo kay mao kini ang nakab-ot nga desisyon sa Presidente aron dili mamiligro ang kinabuhi sa atong kabataan.
Dili gyud ta angay nga mokompiyansa gumikan lagi kay wala pa kita maabti og vaccine dinhi. Aw, unsa pa may mahimo sa taga DepEd ani nga ang Presidente naman ang midesisyon? Mas maayo na lang gyud nga maniguro kay sa magbasol sa kaulahian.
(bobbygnalzaro@gmail.com)