GIPANGSIKOP sa Police Station (PS) 17 sa Davao City Police Office (DCPO) ang upat ka mga tawo lakip na niini ang usa ka 68 anyos nga lalaki atol sa ilang pagdula og mahjong alas 10:45 sa buntag didto sa Purok 1, Baliok, Talomo District, Davao City.
Abtik nga mihimo og anti-illegal gambling operation ang intel operatives sa maong istasyon nga gipangunahan ni Police Chief Master Sergeant Raul Adlawan ubos sa superbisyon sa officer-in-charge sa PS 17 Police Major Joenel Pederio.
Gipang-ila ang mga sugarol nga nasikop nga sila Maricel (bansagon gitago), 42 anyos; Hipolito Ruiz Asoy, 68 anyos, panday ug usa ka Last Two usher; Alberto Abule Tatoy, 64 anyos, balo ug walay trabaho; ug si Danilo Bucala Lim, 52 anyos, pulos nagpuyo sa Purok 1.
Pusta nga P370 ug ang mahjong tiles set ang narekober sa kapulisan, samtang giandam na ang kaso nga ipasaka batok kanila didto sa korte. (Jeepy P. Compio)