Dura: Mga panghinaut sa 2021
GUMIKAN sa wa nato damha nga panghitabo sa kalibutan dala sa coronavirus disease 2019 (Covid-19) nga nakapalisud sa atong kinabuhi, hugot akong nag-ampo nga mahuman na kining pandemya sa unang mga buwan sa 2021.
Sa among paghisgut-hisgot uban sa pipila ka mga higala kung unsa ang ilang New Year's resolution, pipila mitubag nga magdaginot na aron dunay makuot panahon sa kalisud.
Ang uban miingon nga di na manigarilyo, maghubog-hubog, mamabaye, ug tanang dautang buhat -- biyaan na sa pagsugod sa Bag-ong Tuig.
Apan, ang uban nga gwatsinanggo, midayon pag-ingon nga ilang biyaan ang tanang bisyo -- ang di lang mabiyaan mao ang pagpamakak.
Ang pagbiya sa mga bisyo sagad matuman natong mga yanong tawo, ilabina nga nakatilaw na kita sa tumang kalisud tungod sa gipatuman nga istriktong balaod sa gobyerno nga nakapekto sa negusyo.
Daghan sa akong mga higala ang nawad-an og trabaho tungod kay napurdoy ilang kompanya. Daghan usab ang nagsalig sa tabang pinansiyal sa gobyerno, apan niagi usab sa daghang kalisdanan aron makuha ang hinabang.
Ang labing apektado mao kitang mga kabus tungod sa kaestrikto sa polisiya sa lokal nga gobyerno nga nagtinguha nga mapugngan ang pagkuyanap sa Covid-19.
Ugmang adlawa, Disyembre 31, sa paghagtok sa unang segundo sa alas dose sa gabii, mosud na kita sa tuig 2021.
Ang nag-unang panghinaut nako ning tuiga nga hingpit na nga mawala ang pandemiya ug makabalik na kita sa naandan nato nga gibumhaton sama sa face-to-face nga transaksyon sa eskwelahan, pribado ug gobyerno nga mga opisina. Kini aron hingpit na nga makabangon ang ekonomiya sa nasud ug uban pang kanasuran.
Dako ang akong paglaum nga mahitabo kini kung maplano pag-ayo sa gobyerno ang tanang buluhaton aron makapalit og bakuna sa labing daling panahon. Ug hinaut nga madali kini, apan dili i-short cut ang proseso ug motuman gayud sa balaod sa pagpalit ug pag-angkat og bakuna aron seguradong luwas ang mga Pilipino.
Sa ngalan sa SuperB family, ako manghinaut sa usa ka Luwas ug Mabungahong Bag-ong Tuig kanatong tanan!