DAKONG kalipay sa mga kabus sa dakbayan human ang 10-ka-andanang bag-ong edipisyo sa Cebu City Medical Center (CCMC) sa N. Bacalso Ave. eskina Panganiban St., Barangay Pahina Central, Dakbayan sa Sugbo hinayhinay nang giablihan sa sugod niadtong Lunes, Disyembre 28, 2020 pinaagi sa iyang out-patient department (OPD). Nasayod na kita kon unsa kamahal ang nasulod sa mga pribadong ospital nga gipadagan nga sama sa negosyo imbes serbisyo sa katawhan.
Atong pahalipay sa mga opisyal sa dakbayan nga hugot nga nibarog sa pagpalambo sa CCMC sa pagpangulo ni Mayor Edgardo Labella ug kang Bise Mayor Michael Rama, dihang panahon sa iyang administrasyon sa pagka mayor sa siyudad, kinsa unang nisaad sa pagbarog sa bag-ong CCMC. Ang CCMC gideklarar nga dili na luwas human sa kusog nga linog sa 2013 nga niigo sa Central Visayas.
Ang sunod nga administrasyon ni kanhi mayor Tomas Osmeña nga nipahunong sa trabaho tungod sa isyu sa building permit. Apan sa mosunod nga eleksiyon napildi siya ni Labella nga nipapadayon sa pagpalambo sa ospital sa dakbayan.
Daghang hagit ang nasugatan sa pagtukod sa edipisyo labi na sa budget o pundong salapi alang niini. Salamat ni Labella uban sa opisyal sa dakbayan nga walay puas sa ilang pagpaningkamot nga mahuman ang proyekto nga unang giplanohan nga dungan nga ablihan nang tanang departamento. Apan si Labella nakahukom nga hinayhinayon kini pinaagi sa OPD nga unang ablihan nga makaalagad og 300 ka pasyente matag adlaw. Sakto ang mayor aron matutokan ang matag departamento nga ablihan na.
Nalipay usab ang administrative ug medical pesonnel nga apiki ang lang paglihoklihok sa temporaryong gibalhinan nga edipisyo sa Bureau of Fire Department (BFD). Dako kining tabang labi na ning panahon sa pandemiya sa Covid-19.
Dako kining dungog ug garbo sa dakbayan nga nakapabarog og balik sa usa sa mga labing dakong publikong ospital nga gipanag-iya sa lokal nga kagamhanan. Busa, usbon nato sa pagpahalipay sila si Mayor Labella ug Bise Mayor Rama uban sa mga opisyal sa konseho sa dakbayan. Takos kamo sa pagsubli sa pagpili tungod inyong pag-ila sa kamahinungdanon sa serbisyon medikal sa katawhan labi na sa mga kabus.