ADUNA nay lehitimong buwangan ang Dakbayan sa Lapu-Lapu nga mahimong maka operate bisan niining panahon sa pandemya.
Giaprobahan na sa Konseho sa Dakbayan ang aplikasyon sa New Opon Cockpit Arena sa Sitio Suba-Panas, Barangay Subabasbas atol sa special session sa Disyembre 23.
Matod ni Konsehal Rico Amores, chairman sa committee on games and amusement, nalangay ang pag-aprobar sa buwangan sanglit dugay usab nga nakasumiter ang tag-iya nga si Gene Gervacio Jao sa mga rekisitos.
Niadto pa untang unang semana sa Disyembre nangayo og pagtugot sa Konseho ang management nga maka-operate apan sumala ni Amores wala makasumiter si Jao sa mga rekisitos nga gipangayo gikan sa konseho hinungdan nga kanunay kini nga ma defer.
Lakip sa uwahing nasumiter nga rekisitos mao ang occupancy permit, building permit ug electrical permit.
Matag Biyernes, Sabado, Dominggo, Lunes ug Martes maka-operate ang buwangan, sumala ni Amores.
Gumikan kay anaa pang pandemya, ipatuman gihapon sa buwangan ang minimum health protocol sama sa pagsul-ob og face mask ug face shield.
Kinahanglan nga 50 porsyento ra usab nga capacity sa pagkakaron ang gitugotang mohugop sa buwangan.
“Ang amo ra gyud sa council og makakompleto sa requirements, walay rason nga dili namo na aprobahan mao na ako na sulti nila sa una pa. So since naka comply mao amo gi approved,” pagpasabot ni Amores. (GCM)