2 ka mga tiguwang hubog nangamatay sa aksidente

DI MAAYONG magpalabi sa kahubog, labina kon edaran ka na kay posibleng masugamak ka sa aksidente nga mosangko sa kamatayon.

Mao ni ang nahitabo sa duha ka senior citizens, 65 anyos ug 71 anyos, nga nangamatay sa mga aksidente tungod sa tumang kahubog.

Katapusang tagay na ni Elena Pealago, 65, minyo, taga Barangay Matab-ang, Dakbayan sa Toledo sa tuba, uban sa iyang bana ug mga kabanay human siya malumos sa dagat sa Martes, alas 2 pasado sa hapon, Disyembre 29, 2020 kay naligo nga hubog.

Si Police Staff Sergeant Carlos Baluado sa Toledo Police Station nga nahinabi sa Superbalita Cebu, nagkanayon nga si Elena, uban uban sa iyang bana nga si Wilfredo, mga kabanay ug higala nagtagay og tuba.

Dihang nahubog si Elena, nananghid kini nga maligo sa dagat pipila lang ka metros ang gilay-on gikan sa Sitio Canjuntic.

Pipila ka minutos ang nakalabay, nakit-an siya ni Wilfredo nga naglutaw nga wa na magginhawa.

Dali siyang gidala sa tambalanan, apan patay na pag-abot.

Samtang 71 anyos nga biyudo namatay human nahagbong sa bung-aw gumikan sa kahubog sa Sabado sa ala 1:00 sa hapon, Disyembre 26, 2020 sa Dingayop River, Sitio Lower B, Brgy. Ubo, Lungsod sa Dalaguete.

Si Roger Besin, mag-uuma, taga Brgy. Langka patay na nga napalgan sa Dominggo sa hapon human nawala.

Si Police Corporal Jim Pacaldo, imbestigador sa Dalaguete Police Station nga nahinabi sa Superbalita Cebu, nagkanayon nga si Besin gikan sa balay sa iyang anak nga si Vincent kay naghikay sa fiesta sa ilang barangay.

Si Besin nga hubog nag-inusara nga nipauli. Gituohang siya nadakin-as sa pangpang nga may gitas-on nga 20 ka tiil.

Tungod kay hait ang mga bato, grabi ang naangkon kadaot sa kalawasan ni Besin.

Ang mga kabanay sa biktima nahibolong kay siya wa na igkita human mamista niadtong Sabado.

Ang mga apo ug anak miadto sa panimalay ni Vincent kon naa ba ilang amahan kay wa sa payag sa iyang umahan.

Sa ilang pagsubay, ilang napalgan ubos sa pangpang ang nga hapit na mapunta sa sapa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph