ABLI na ang Dumaguete City-Cebu, vice versa nga rota sa bus, matod sa Land Transportation Franchising and Regulatory Board (LTFRB) 7.
Matod ni LTFRB 7 Regional Director Eduardo Montealto Jr. niadtong Disyembre 29, 2020, nga ila nang gipahibawo ang Vallacar Transit Inc. (VTI), operator sa Ceres Bus Liner, sa miaging semana, Disyembre 23, nga gitugot na ang inter-province nga biyahe ani nga rota.
Ang rota nasuspenso og pipila ka buwan tungod sa mga pandemic-induced community quarantines ug lockdowns.
Apan dunay problema sa pagsulod sa pasahero sa Dumaguete.
“Usa pod sa ilang problema lagi is ang pasahero. Gawas lang atong pasahero nga taga Cebu g’yod. Pero katong taga Dumaguete nga moanha lang og Cebu, hesitant sila kay kon mobalik sila og Dumaguete i-quarantine naman pod,” matod ni Montealto.
Hayan sa tunga-tunga pa sa Enero makadagan ang mga bus.
Segun ni Montealto nga base sa impormasyon nga naabot kaniya, nagsugod na og lihok ang VTI sa ilang aplikasyon alang sa special permits sa 12 ka mga Ceres bus unit.
Posible pa kining madugangan depende sa makita nila nga reaksyon o tubag sa mga pasahero.
Matod niya nga monitoron nila ang operasyon sa mga transport company nga nag-apply og special permit to operate aron masiguro nga nagdagan ug nagserbisyo sa publiko ang units nga giisyuhan nila og special permits.
Segun niya posible nga sa umaabot tunga-tunga sa Enero 2021, aduna nay first batch sa mga bus nga magdagan sa Dumaguete City-Cebu nga rota.
Depende kon way kausaban sa lagda sa Malacañang labot sa pandemya.
TPUJ
Sa laing bahin, anaa na sa 18 ka traditional public utility jeepneys (TPUJs) ang nahatagan na og special permit to operate sa Mandaue City, base sa datos sa LTFRB niadtong Disyembre 29.
Lakip niini ang mga rota nga: Liloan-Mandaue City (tulo ka units); Ibabao, Mandaue City (10 ka units); MEPZ sa Lapu Lapu City-Mandaue City (usa ka unit), Ouano, Mandaue City (usa ka unit), Danao-Mandaue City (usa ka unit), Compostela-Mandaue City (usa ka unit) ug Consolacion-Mandaue City (usa ka unit.)
“Gagmay ra man hinuon og kulang ang uban. Kasagaran ani sa emission, wala pa kaayo malimpyuhi. Ang uban pod, ang furniture niya gisi. Among gipailisan,” matud ni Montealto.
Samtang niabot na sa 324 ka mga TPUJ units ang nahatagan usab og special permit sa Cebu City.
Matod ni Montealto nga wa na silay limit sa ihap sa mga TPUJs nga mahatagan og special permit basta lang consolidated na sa usa ka kooperatiba.
Matod niya gisibog ang deadline sa consolidation sa mga TPUJs gikan sa Disyembre 31, 2020 ngadto na sa Marso 31 sunod tuig.
Matod ni Montealto nga tungod kay nakabalik na sa pagdagan ang TPUJs, ni-konsulta siya sa kadagkuan sa mga syudad kon angay na ba i-pull out ang mga bus.
Matod niya nga naka desidir ang mga LGU sa pagkakaron, nga di lang usa i-recall ang mga bus.
Anaa sa 192 ka mga bus ang nagdagan karon sa Cebu City, matod niya.
Sa kinatibuk-an, anaa sa 872 ka mga buses ang nag operate karon sa Metro Cebu, lakip ang Cebu Province samtang 297 ka mga modern PUJs usab ang na-deploy na sa Cebu.