SA MGA nangita og kasuroyan nga adunay white sand beach ug layu sa kasamok sa siyudad, aniay akong ika-recommend nga dapit nga susama ra nga mibakasyon ka sa Boracay Island, Panay.

Apan kining dapit nahimutang sa isla sa Northern Samar nga angayang iapil nimo sa imong bucket list nga imong giplanohan nga duawon.

Sa mahilig og suroy sa probinsiya, siguradong imong masinate ang “rural tranquility” niining dapita.

Asa dapita?

Ang San Antonio usa ka island municipality sa amihanang bahin sa Samar island.

Nasakop kini sa Eastern Visayas nga adunay populasyon nga kapin sa 9,000 base sa 2015 Census of Population data.

Waray ug Cebuano ang pinulongan nga gamit sa lungsod.

Adunay habal-habal nga imong kasakyan paingon sa area nga dugang sa imong adventure sa pagsuroy-suroy.

Sa pagkatinuod lang, minus pa ang public transportation sa area busa ayaw na og pangita og bus, PUJs, ilabi na ang taxi.

Unsaon pag-adto?

Tungod kay nahimutang ang San Antonio sa tunga-tunga sa Pilipinas, accessible kini sa mga maggikan sa Luzon, ubang parte sa Visayas ug sa Mindanao.

Kon maggikan ka sa Sugbo adunay barko ug fastcraft paingon sa Calbayog, Samar.

Molanat ngadto sa 12 ka oras ang biyahe sa barko nga anaa sa P850 ang one-way nga pletehan sa Economy accommodation.

Sa kadtong gustong madali, aduna say fastcraft nga sud lang sa lima ka oras ang biyahe nga P1,200 ang one-way nga pletehan sa ecomony class.

Sa imong pagdunggo sa Calbayog, sakay og dyip o van for hire paingon sa Allen, Northern Samar.

Sa pag-abot sa area, adunay pump boat nga mobiyahe paingon sa isla sa San Antonio.

Gawas sa Allen, aduna say mga pump boat nga manukad sa Lungsod sa Victoria ug San Isidro, diin ang biyahe sa pump boat molanat ngadto sa 20 ngadto sa 30 minutos nga paglawig.

Sa kadtong maggikan sa Luzon area, adunay biyahe sa mga bus o van sa Matnog, Sorsogon ug adunay barko nga molabang paingon sa Allen, Northern Samar.

Suroyanan

Kon white sand beach imong gipangita, dili mangiwit ang isla sa San Antonio.

Sa imong pag-abot sa lugar ang nag-amag nga kaputi ug morag pulbos nga balas sa baybayon maoy mosugat kanimo.

Gianggaan ang maong dapit nga “Little Boracay” sa ubang turista nga nakataak na sa area tungod kay dili layo ang maong baybayon sa inila na kaayo nga Boracay beach.

Adunay pipila ang nag-negosyo og resort sa maong dapit ug usa na niini ang Ada’s Garden Beach Resort nga nahimutang sa Sityo Lagbangan, Barangay Ward 1.

Ang Ada’s Garden ang labing bag-ong resort sa San Antonio nga gibuksan niadtong Marso 2020 taliwala sa hulga sa Covid-19.

Apan tungod sa nagpadayon nga pandemiya, wa pa kaayoy gitugtan nga makasud sa nahisgutang lugar gawas sa isla.

Kasamtangan nga ang mga residente sa San Antonio ang mi-patronize niini sa pagkakaron dili lamang tungod sa white sand beach sa maong resort, apan tungod sa kalapad sa baybayon ug kamingaw sa dapit.

Mga millennials siguradong malingaw sa Instagrammable spots sa maong resort.

Adunay nature feels ang maong beach resort tungod kay gilibutan kini og mga kahoy, madungog ang huni sa mga langgam, ug sa kagabhi-on mogilak ang siga sa fireflies nga tagsa nalang masinate niining modernong panahon.

Accommodation

Sa nagplano og overnight stay sa Ada’s Garden Resort, aduna silay gitanyag nga rooms apan tungod kay bag-uhay pa lang ang resort, adunay upat pa lang ka mga rooms ug aduna say cottages sa kadtong mosuroy sa adlawan.

Ang rooms nagkantidad og P350 matag tawo, lain ang P800 good for two.

Sa mahilig og adventure sama niadtong gustong mag-tent, mamahimong moabang o magdala og kaugalingong tent.

Gawas sa Ada’s, aduna pay laing spots nga inyong kasuyoran sa isla sa San Antonio kon gusto ninyong mga joyride angkas sa habal-habal.

Alang sa dugang detalye bisitaha ang official Facebook page sa Ada's Garden @adasgardenlagbangan. (Ubang hulagway tampo ni Suzette ug KP Mondoñedo)