Samtang nagkadaghan ang teams nga mingpadayag sa ilang interes, ang mga nagpasiugda sa gikahinaman nga Visayas-Mindanao Super Cup basketball tournament mitudlo ni kanhi PBA star Dondon Hontiveros isip ambassador sa maong lega.
Ang giilang Cebuano Hotshot sa bugtong professional league sa nasod mao usab ang magsilbing adviser ug sa samang higayon mopasawo sa iyang kasinatian sa basketball.
“Passion man gyud na natong sports or basketball, so andam gyud ta motabang ani ilabi na sab sa mga player,” matod ni Hontiveros.
Ang 41-anyos nga kanhi sakop sa national team Gilas Pilipinas kasamtangan nagserbisyo isip konsehal sa Dakbayan sa Sugbo. Si Chelito Caro, ang coordinator sa Visayas Division, nagtuo nga ang presensya ni Hontiveros makahatag og dakong tabang sa liga.
“Dunay pangan si Dondon (Hontiveros) sa basketball unya maayo sab ang iyang reputasyon. Daghan kaayo siya og matabang,” ni Caro pa.
Subay niini, ang mga nagpasiugda sa nahisgutang liga nga gipangulohan ni Rocky Chan mopahigayon og virtual meeting uban sa team owners/representatives nga mipakita og interes sa liga karong Enero 4, 2020.
Kini aron pagtuki ug paghingpit sa mga kasabutan ilabi na sa operasyon sa basketball.
Gawas sa mga Dakbayan sa Talisay, Mandaue ug Lapu-lapu nga nihatag na sa ilang kopirmasyon, pipila usab ka teams ang padayon nga nakigsabotsabot sa organizers.
Gituohan nga moabot ngadto sa unom ka teams ang magtigi sa Visayas Division samtang laing unom usab ang magtakos sa Mindanao Division. Ang makampiyon sa matag division maoy mag-abot sa finals. / JBM