Una sa tanan, Bulahang Bag-ong Tuig! Ato nang talikdan ang tuig 2020, ang Year of the Rat sa Chinese calendar, usa ka tuig nga halandumon. Tuig nga angay natong handumon uban sa pangaliya nga unta di na kini mahitabo pag-usab.
Sa tuig nga milabay, gihugpaan kita sa mga katalagman. Mibuto ang bulkang Taal. Gitay-og ang nasod sa mga linog. Gikuso-kuso sa sunod-sunod nga mga bagyo. Daghang mga kinabuhi ang nakalas, binilyon ka pesos nga kabtangan ang naguba, linibo ang nawad-an sa mga pinuy-anan.
Ang wa damha mao ang paghugpa sa mananakod nga coronavirus. Tungod sa Covid-19 pandemic, gidid-an ang mga tawo sa paggawas sa ilang mga balay. Natinuod ang Year of the Rat kay ang mga tawo mora’g mga ilaga nga mahadlok mogawas sa lungag.
Sa naghinapos na ang 2020, gilugakan sa gobyerno ang kwarantin. Ang Covid-19 nahisama sa usa ka mabagang panganod nga mitabon sa kalangitan. Apan migitib ang gamay’ng bidlisiw sa adlaw sa dihang nanggawas ang mga bakuna batok niini.
Apan wa pa gani moabot ang bakuna dinhi sa Pilipinas, bisan dunay mga taho nga duna nay gipangbakunahan, nigawas ang hulga sa bag-ong nadiskubrehan nga Covid strain nga mas grabe ka mananakod.
Ang gobyerno mipatuman sa usa ka travel ban sa 20 ka mga nasod sa paningkamot nga di moabot sa Pilipinas ang bag-ong klase sa coronavirus. Ang atong gikabalak-an kay ang coronavirus di motahod og utlanan.
Sa atong pagsugat sa Bag-ong Tuig, ang syudad sa Sugbo aduna nay bag-ong building sa Cebu City Medical Center (CCMC). Wa pa mahuman ang 10 ka andana, apan gibuksan ang unang tulo ka andana niini alang sa outpatient department niadtong Disyembre 28, 2020.
Ang maong proyekto nag-agi og tulo ka mayor. Gisugdan ni Mike Rama, giundang kadiyot ni Tomas Osmena, ug ang hinungdan sa partial opening niini, ang incumbent nga si Mayor Edgardo Labella.
Si Labella nisaad nga buksan ang unang tulo ka andana sa maong building sa buwan sa Disyembre. Gipakita ni Labella nga kon tinud-on sa mga opisyal sa gobyerno ang ilang mga saad, matuman gyud.