Pormal nang gitugyan sa Department of Public Works and Highways (DPWH) Cebu 6th district office ang bag-ong upat ka andanang multi-purpose building sa Brgy. Agus, Dakbayan sa Lapu-Lapu.
Ang edipisyo gigahinan og P6,603,964.37 nga salapi sa DPWH pinaagi sa koordinasyon ni Kongresista Paz Radaza.
Aduna kini roofdeck nga mahimong magamit sa bisan unsa nga event o panagtigom sa umaabot nga may kalabotan sa barangay.
Si Agus Kapitan Jimboy Igot nibutyag nga mao na kini ang magsilbi nilang bag-ong barangay hall aron kahatagan usab og kaharuhay ang mopahigayon og transaction sa ilang barangay.
“Daku akong pasalamat ni Congresswoman Paz Radaza sa paghatag kanamo ug nindot kaayo nga bag-ong barangay hall. Kini nagpakita sa iyang paningkamot para sa katawhan sa Barangay Agus.
Salamat sad kang Ma’am Suzette (Nwanaka) sa DPWH sa paspas nga pagtrabaho ani nga building,” matod ni Igot.
Si Radaza, sa iyang bahin, nibutyag nga moabot na sa P1 bilyones ang gahin nga iyang gitagana sa DPWH alang sa pagtukod ug mga imprastaktura sa distrito sa Lapu-Lapu. Mapasalamaton siya sa ahensya sa nindot usab nila nga pagtambayayong sa pagpatuman og mga proyekto sa dakbayan.
Mitambong sa turnover ceremony gawas sa kongresista mao sila Cebu 6th district engineer Suzette Nawanaka, ABC President Eduardo Cuizon, ug ubang kapitan sa Dakbayan sa Lapu-Lapu. / GCM