Karon Enero 2021 duna na untay bakuna gikan sa Pfizer nga moabot sa nasod, apan wa kugihi ni Health Secretary Francisco Doque III og himog mga dokumento aron mahingpit ang kasabutan ug pagpalit.
Ang Singapore mag-una na hinuon sa pagdawat sa mga bakuna nga maoy labing unang napalgan nga epektibo batok sa Sars-CoV-2, kagaw sa coronavirus disease. Duna na untay makaginhawa gikan sa grabeng quarantine nga gisugdan niadto pang Marso.
Bitaw, di tiaw ang gidugayon sa quarantine, labina sa mga batan-ong 15 anyos paubos ug senior citizens nga nagpanuigon og 65 anyos pataas. Hangtod karon, sila ang wa pa tugoting makagawas.
Yuna pa, unsa kaha kon wa pay internet connectivity ug social media sa pag-igo sa Covid-19? Unsa kahay mahitabo sa mga tawo? Imagine kon ang mga cellphone kadto pang di smart phone, sama sa Nokia 3310. Unya wa pa sab ang chat pinaagi sa Messenger.
Maayo na gani ron kay mahimo na ang chat, maka Facebook basta naa lay data ug maka video call ang mga kabanay nga nahamuwag tungod sa quarantine.
Naa na say kalingawan sa internet sama sa Tiktok ug uban pa nga nakalingaw taliwa sa kalaay sa pagpriso sa kaugalingong balay. Naa say online games nga kalingawan.
Huna-hunaag maayo kon wa pa kining teknolohiya sa komunikasyon karon, basin daghan ang nangabuang ug kadtong di makaaguwanta, nag wild na tingali sa karsada. O kaha, mayoriya sa mga tawo nanggawas bisan kalapasan sa health protocol.
Busa, bisan pa sa mga kalisdanan sa 2020, angay gihapon kitang magpasalamat sa Diyos nga sa pag-igo sa Covid-19, naa na ang modernong teknolohiya nga naggamit sa pagpalabay sa kalaay ug kamingaw ug pagbati nga nag-umido.
Busa, magmalipayon tang mosugat sa Bag-ong Tuig, Ka Super!