Tungod sa padayon nga nasinati nga krisis sa nasud tungod sa pandemiya, gipahibalo ni Gobernador Gwendolyn Garcia nga mopadayon ang lalawigan sa Sugbo sa pagbanhaw sa ekonomiya ug mopatuman sa Enhanced Countryside Development (ECD) sa tuig 2021.
“Wa ta ni focus ana nga atong tawgon og Covid-19 budget. Unya mamalit ta og mga butang nga walay makita pagkahuman nimo gigasto kay total kaya mana, unsa mana ang atong approach, boost the immune system against Covid-19. Mananom ta, maintain a healthy lifestyle, inom og kalamansi, that’s vitamin C. We are distributing free vitamins, air purifiers kay two-pronged man ta, kaning atong paggamit sa mga bag-ong technology. On the other hand, let us spend funds with more lasting value particularly so that we maybe able to revitalize our economy,” matod ni Garcia.
Atol sa pakighinabi sa mga tigbalita sa Disyembre 29, Martes, gisaysay ni Garcia nga sukad nga gipaubos sa modified general community quarantine (MGCQ) ang lalawigan sa Sugbo gisugdan na niini ang hinayhinay nga pagbukas sa turismo nga usa sa pangita sa mga Sugboanon.
Nalakip sa labing unang tourist destination nga gibuksan mao ang whaleshark watching sa Lungsod sa Oslob, All-Terrain Vehicle (ATV) Adventure sa Lungsod sa Barili, Island Hopping ug sardine run sa Lungsod sa Moalboal, canyoneering sa Badian ug uban pa.
Sa kinatibuk-an nga ihap moabot na sa 257 na ka mga establisimento sa Lalawigan sa Sugbo may labot sa turismo ang gitugotan nga mobukas bisan pa man panahon sa quarantine period.
Gawas sa turismo gilusad usab sa kagamhanan ang SugBusog nga programa sa mga lokal nga kagamhanan aron masiguro nga may anihon ug makaon ang mga Sugboanon taliwa sa nasinati nga krisis.
Sugdan na sab ang ikaduhang hugna sa maong programa diin magsangka ang mga purok, barangay, distrito ug kalungsoran sa may labing mabungahon ug maanindot nga mga pananom.
“Kining SugBusog atong gilantaw nga dili lang makatabang sa matag pamilya,” matod ni Garcia.
Subay sa nasinati nga krisis daghan sa mga Sugboanon ang nawad-an og trabaho ug panginabuhian, tungod niini nahimugso usab ang Sugbo Negosyo program sa Kapitolyo nga magtabang sa mga Sugboanon nga makasugod og kaugalingon nga negosyo o pangita.
Sa tibuok tuig dili lang sakit sa tawo ang giatubang sa nasud apan lakip na sa mga hayop ilabi na sa baboy.
Hangtod sa 2021, gibutyag ni Garcia, magpabilin ang pag-ban sa karneng baboy ug pork related products nga mosulod sa Sugbo ilabi na kadtong gikan sa mga lugar nga apektado sa African Swine Fever (ASF). Nagpabilin nga ASF-free ang Lalawigan sa Sugbo.
Una na nga gipadayag ni Garcia nga maghuwat lang ang Porbinsya sa ihatag nga bakuna sa kaulohan ug mo-focus alang sa pagpalambo sa mga kalungsoran.
Usa sa gihatagan og dako nga pundo sa Kapitolyo ang pagpasemento sa mga kadalanan sa mga kalungsoran. Lakip na usab ang pagpananom aron pag siguro nga mahimong self-sufficient ang Probinsya sa Sugbo sa sunod nga mga katuigan, ang planong pagbalhin sa mga serbisyo sa Kapitolyo sa Lungsod sa Balamban ug ang pagpalambo sa mga serbisyo sa mga provincial ug district hospitals as lalawigan. / ANV