Miyerkules, Disyembre 30, samtang ang uban nahinanok ug nag-enoy sa mabugnaw nga kabuntagon ug sa holiday, di momenos 200 ka mga tawo ang wala manumbaling sa ulan ug nagtapok sa alas singko sa buntag aron mohatag sa ilang serbisyo sa pag-atiman sa kalikupan.
Ang Metropolitan Cebu Water District (MCWD) CSR Group kauban ang mga opisyal sa Barangay Jaclupan ug volunteers malampuson nga mipahigayon sa clean-up drive and community beautification sa agianan padulong sa impounding ug catchment facility sa MCWD.
Nahimutang sa Jaclupan ang impounding ug catchment facility sa MCWD nga adunay production nga mokabat sa 33,000 cubic meters matag adlaw.
Ang maong water supply facility, nga naila nga Mananga Phase I Project, nagkantidad og P770 million ug nahuman niadtong 1998. Ang pasilidad adunay 15 ka wells, usa ka seven-meter mini dam o diversion weir, ug sedimentation and infiltration facilities.
Ang clean-up drive nga gipangulohan ni Atty. Manolette Dinsay, sakop sa MCWD Board of Directors (BOD), gitambungan ni Talisay City Mayor Samsam Gullas.
Siya mipadayag sa iyang pasalamat nga ang Jaclupan ang gipili kun asa ipahigayon ang unang proyekto sa MCWD CSR Group tungod kay ang maong kalihukan nauyon sa iyang direksyon nga paghimo sa Talisay nga limpyo ang syudad.
Iyang gipaambit nga sa iyang pag-asumir isip mayor niadtong Hulyo 2019, usa ka kinadak-an nga suliran nga iyang giatubang mao ang baha. Siya niumol og action team ug gilunsad ang cleaning ug declogging program. Matag buwan, nipahigayon sila ug river clean-up ug gikan Hulyo hangtod Disyembre, nakakuha sila og mokabat 200,000 ka kilo nga basura.
“I want to show to the people nga aduna’y goberno nga willing molimpyo alang sa katawhan. Apan dili kaya sa goberno tanan. Dako ang akong kalipay niining initiative sa MCWD,” matod sa mayor.
Si Dinsay, sa iyang bahin, niingon nga ang gihimo sa MCWD usa sa paagi nga makaserbisyo ngadto sa katawhan tungod kay ang MCWD nag-operate sa pasilidad niini sulod sa Barangay Jaclupan.
Iya usab gipasalamatan ang mga volunteers sa dako nilang tabang sa maong kalihukan.
Matod ni MCWD acting general manager Stephen Yee, aduna pay mosunod nga kalihukan nga ipahigayon ang MCWD CSR Group. Matod usab niya, ang clean-up drive alang usab sa mga kabataan aron padayon sila nga makatagamtam og limpyo nga saba ug tinubdan sa tubig.
Malipayon usab si Dr. Lagrimas Abarquez, head sa Talisay City’s Waste Management Program, sa maong programa kay tumong sa iyang buhatan ang makigtambayayong sa lain-lain nga ahensya aron mapatuman ang ilang waste management programs. Nakatambayayong na nila ang mga eskwelahan, Bureau of Fire ug ang PNP.
Ang MCWD CSR Group mi-turn over og garbage bins ug used tires ngadto kang Mayor Gullas ug Jaclupan Barangay Captain Marissa Orbiso.
Ang mga ligid magsilbi nga plant box ug gilinya kini kilid sa dalan padulong sa Jaclupan riverbank ug gipintalan sa mga volunteers. / PR