Si Cebu Archbishop Jose Palma niluwat og pamahayag alang sa bag-ong tuig ngadto sa mga Sugbuanon nga magtutuo pinaagi sa pagdapit sa tanan sa pagtan-aw sa mosunod nga tuig uban sa bag-ong timaan sa paglaum, pagsalig ug pagpangaliya alang sa kalinaw sa kalibotan.
Si Palma, sa iyang mensahe, nipasabot nga walay makatagna sa insaktong mahitabo sa umaabot nga tuig, apan dason niya, ang mga magtutuo nasayod kon kinsa ang nagkontrolar sa umaabot.
“If you look at the image, the statue that we have, the Señor Sto. Niño, then we know, in his hands, is the world,” matod ni Palma.
Dugang niya nga ang Archdiocese of Cebu nangandam sa mga programa alang sa kasaulogan sa 500 years sa Christianity sa nasod nga nagsugod sa Sugbo.
Ang imahen sa batang Hesus mao ang rason nga bisan sa pandemiya ug tanang hagit sa katawhan sa umaabot, ang mga magtutuo iyang gipasalig nga “maka-survive, revive ug thrive.”
Iyang gipanawagan sa mga magtutuo nga mas manggiluy-on labi na sa nanginahanglan.
“He is God’s way of telling us, yes he is small and that’s why we care for the small and the little, but he is also God’s way of assuring us not to be afraid because we know he is as well a powerful God and a great and merciful redeemer,” matod ni Palma.
Si Palma nagkanayon nga mapasigarbuhon sa Sugbo ug mapasalamaton sa pagtuo sa presensiya ni Birhen Maria, pinaagi sa pagsubay nga kapin sa 25 porsiyento sa mga parokya sa Sugbo deboto sa Birhen. / WBS