WA PA mahuman ang pandemya. Nagkaguliyang pa ang liderato kabahin sa bakuna. Apan nasiguro ko nga moabot gyud sa dakong bahin sa populasyon sa Pilipinas ang bakuna karong tuiga. Mao nga angay malipay kita karong 2021.
Dawaton na lang nato nga samtang naulahi kita sa pag-order og mga bakuna kon itandi sa ubang nasud, nag-una-una tawon ang mga sakop sa Presidential Security Group gamit ang smuggled nga mga bakuna.
Unsa man say atong mapaabot niining administrasyon nga sa makapabor lang? Dayon, daghan unya dayong mga palubog aron di na kita makahibawo unsa gyuy nahitabo.
Bisan pa man, magsang-at na og certificate of candidacy karong Oktubre. Sigurado ko nga maninguha ang administrasyon nga dakong bahin sa populasyon ang nabakunahan na nianang tungora.
Dali kaayo makalimot ang Pinoy sa mga palpak inig abot sa bakuna. Mao nga dalion na nila kini ug gamiton alang sa kampanya sa politika.
Survey
Samtang tinuod layo pa gyud ang 2022, nagsugod na og kutaw ang politika oi. Karong bag-ong tuig, naa dayuy niguwa nga kwestyonableng survey sa False Asia nga nag-una si Davao City Mayor Inday Sara Duterte.
Ang nakapaduda nako sa maong survey mao ang tayming. Tuyo niini mao ang pagsiguro nga si Inday Sara ba ang numero uno o dili maoy mahisgutan pag Bag-ong Tuig. Palihi oi.
Tinuod, moabiba gyud dayon ang mga DDS. Molalis sab ang mga anti-Duterte. Busa, si Inday Sara ang malalisan. Alang sa mga naa ra nagsud-ong sa daplin, moguwa nga siya ang gilalisan. Busa sakto gyud tingale nga siya ang front runner. Maingon nato nga PR maneuver.
Sa pagkakaron, daghan ang posibleng manglansar. Sa perming kasuko ni Presidente Duterte ug iyang mga DDS, mabasa nato kusog-kusog gyud si Bise Presidente Leni Robredo. Giingon nga interesado si Manila Mayor Isko Moreno. Naa si kanhi senador Bongbong Marcos. Ang mga loyalist ni Presidente Duterte gusto nga si Sen. Bong Go ang modagan. Naa sab ang ubang mga senador nga sila si Senador Ping Lacson, Senador Grace Poe, ug Senador Manny Pacquiao.
Sa maong grupo, makaingon ko nga seryuso nga modagan mao kini si Leni ug Pacman. Kining uban labi na si Bongbong kay magbisi presidente kana ining abot sa panahon. Kay si kinsa may mosalig nga frontrunner ang usa ka pildero?
Sugbo
Si Leni maoy grabing gibunalan sa administrasyon sukad pa sa pagsugod niini kadtong 2016. Pero hangtod karon, daw na maintain niya ang iyang suporta.
Si Pacquiao, sa iyang bahin, nakakuha karon sa liderato sa PDP-Laban ug dunay potensyal nga makakuha sa imahinasyon sa masa nga nangita og bayani. Ug atong nasayran nga mobisita dinhi sa Sugbo si Pacman karong semanaha. (@anol_cebu sa Twitter)