USAHAY, kining atong policy makers o tig-desisyon sa mga health protocol aron sa paglikay sa Covid 19, way klaro. Sa iningles pa ‘inconsistent’. Sama aning ilang pagdili nga magtapoktapok. Ilang gidili ang mass gathering sama sa pagpanaygon, Christmas parties, re-unions. Bisan man gani ang karaoke ug videoke sessions. Apan ilang gitugot ang Misa de Gallo niadtong Disyembre.
Dili pa lang dugay, gipahibawo ni Presidential Spokesperson Harry Roque nga gawas sa face mask, gikinahanglan nga mag-face shield pa aron dili gyud matakbuyan sa virus. Apan ang Department of Health (DOH) nagkanayon nga dili maayo ang pagsul-ob og face shield labi pa kadtong maglisod og ginhawa. Unsa man gyuy klaro ani?
Ania kita karon sa punto sa atong kinabuhi nga labihang paspasa sa dagan sa teknolohiya ug ingon sa naglawod-lawod sa kalapad ug kadaghan sa mga options o alternatibo nga atong giatubang. Hinungdan nga tungod sa kadaghan sa atong mga kapilian, maglisod na hinuon kita sa pagpili. Sama pananglit sa gipamugos nga mga health protocol.
Usahay, tungod sa kadaghan sa ipatuman maglisod na tag desisyon kon hain niini ang husto ug hain ang sayop. Sama nga gimanduan kita nga dili magtapok-tapok pero kon taga gobiyerno ang magtapok, okey ra basta naay face mask. Nagsugod tag kalibog unsa sila ka insakto nga mamugos kanato sa protocol. Unya gimanduan kita nga mag sul-ob og face mask ug dili pa igo, atong sapawan pa sa face shield aron paniguro gyud nga dili kalusot ang Covid 19. Pero karon gi-ingnan na usab kita nga dili gyud diay sigurado nga proteksyun ang face shield, kuyaw pa kini sa disgrasya.
Kanus-a kaha sila matarong sa pagtudlo kanato sa unsay labing husto ug kanus-a kaha sila mahuman sa ilang taghap-taghap nga teyoriya sa pagbuntog sa Covid 19? Matod pa sa mga LGBT: ‘mabayot ko ani boang.’
(bobbygnalzaro@gmail.com