SA MGA trabahante karon nga dunay nadawat nga bonus, posible nga naka budget alang sa pagpalit og biseklita kay mao sab ni ang akong gihimo kaniadto sa pagpalit nako sa unang mga biseklita namo, ang BMX ug mountain bike.
Nangita ko og affordable nga biseklita nga akong napalit og P8,100 sa usa ka bikeshop. Okay ra ang frame kay Kona, apan ang mga dapat ilisanan gyud. Tuod man, akong giilisan ang fork, crankset ug uban pa.
Didto nako naamguhan nga di maayo ang pagpalit og built-bike kun human daan kay mas makabarato ka kon assembled. Ang importante kaayo sa biseklita mao ang frame kay mao ni ang trademark nimo. Mao bitaw nga moingon ko nga unaha ang frame kay mao ni ang unang tan-awon sa mga suhitong biker.
Mas maayo sab nga kasaligan nga brand ang paliton nga dugay na sa mountain bike frame manufacturing.
Sa akong experience, nadako na hinuon ang akong gasto tungod kay nipalit ko og groupset nga pang 8-speed kay ang akong bike nga napalit 7-speed pa niadtong higayuna. Apan ang nagsugod og ka uso ang 9-speed pa.
Huna-hunaag maayo isip example. Kon nakapalit ka og human daan nga Giant ang frame, ang presyo moabot og labing minos P40,000 apan ang iyang mga dapat basic kaayo nga air fork, groupset ug uban pa. Apan kon assembled, ang imong P40,000 nga segurado kong arang-arang og mga dapat.
Pugngi lang ang kaibog nimo, tigomi lang una.
PRESYO GIBAYRAN
Kon gusto ka og lig-on, maayo og klase sa biseklita, ayaw pag-ingon og nindot unya barato. You get what you pay for sa ginaingon pa. Unsay imong gibayran, mao sab ni ang imong makuha. Kon makapalit ka man og barato nga high end bike posibleng mao ni ang hinungdan: kinawat, duna nay mga guba sa sud sa mga parts o nagdali ang tag-iya sa pagbaligya.
Kay way barato nga nindot. Mas maayo nga kon mopalit ka man unya ang imong plano mokuyog ka sa mga trail, pag-budget og igo-igo kay seguradong mabugbog ang imong biseklita sa biyahe. Basin sa kabati sa agianan, malingkong ang imong wheelset o mabawog ang imong fork o mabali ang handle bar. O di man gani, mo malfunction ang imong brakes.
Busa sa sunod, mangita gani ka og biseklita o parts, ayaw pag post og: nangita ko og nindot, kanang barato lang. Way nindot nga barato sa pagka tinuod lang.
COUNTERFLOW
Daghang siaw nga mga tigbiseklita mao nang ang publiko, labina mga drayber, moingon nga daghang way ayo nga biker, magpataka lang og sikad kay mo counterflow sa traffic.
Di baya sab kay daghan sa bikers ang educated. Kon naa may traffic violator, ayaw i-generalize kay di tanan sipat, di tigtuman sa balaud. Daghang mga siklista nga responsible sa karsada.