NASAGMUYO ang kapitan sa Barangay Poblacion, Dakbayan sa Talisay human masikop sa buy-bust sa kapulisan ang iyang drayber sa ambulansya sa Huwebes sa alas 6 sa gabii, Disyembre 31, 2020.
Si Rodney Delfino, 53, ingon man ang iyang duha ka mga kauban nga sila si Jamel Tebasa ug Repolido, 28, nasikop sa Police Drug Enforcement Group (PDEG) Visayas- Special Operations Unit-5, kuyog ang Talisay City Police Station, Regional Drug Enforcement Unit (RDEU) -7 ug Philippine Drug Enforcement Agency (PDEA)-7
Ang buy-bust gipangulohan ni Police Lieutenant John Kennedy Pajantoy.
Atol sa anti illegal drug operation, nasakmit ang gituohang shabu nga balor og 325 gramos nga mobalor og P2.2 milyones base sa Dangerous Drugs Board (DDB) value.
Matod ni Poblacion Barangay Captain Edward Alesna nga pipila na ka mga buwan ang milabay, natingala siya kang Delfino ilabi na kon mahuman og drive sa ambulansiya, kalit lang mawala.
“Kon duna ta kinahanglanon niya, kon atong pangitaon, di na makit-an,” matod ni Alesna.
Dugang ni Alesna nga niadtong Disyembre 30, iyang gihangyo ang mga staff sa barangay, apil na si Delfino, gihangyo nga mag-estambay lang sa barangay hall aron kon gikinahanglan motabang sa pagpanghatag sa aid sa senior citizens ug persons with disability (PWD).
Si Delfino wa na igkita.
“Nitunga siya pero alas 3 na sa hapon. Akong gipangutana, iyang tubag nga sakit iyang tiil. Gani wala siya magpabalo gyud bisan tawag o text na lang,” dugang ni Alesna.
Giangkon usab sa kapitan nga nagtuo siya nga wa na malambigit si Delfino sa drugas.
Nitahan kini ug nisaad nga dili na mogamit.
Samtang si Police Lieutenant Colonel Warren Dablo, pangu sa PDEG Visayas, nihulagway kang Delfino nga regional high value individual tungod sa kadaghan sa nasakmit nga drugas.
Dugang ni Dablo nga moabot usab sa kapin duha ka semana ang ilang pag monitor sa ilegal nga kalihukan ni Delfino.
Samtang si Delfino niingon nga nadani siya sa bayad nga moabot og P5,000 ang ihatag matag suhol.
Dugang ni Delfino nga duna lay motawag kaniya kon ipakuha na ang mga kontrabando aron sila magtagbo.