5 ka barangay duna na say kaso sa Covid-19

LIMA ka mga barangay sa Dakbayan sa Sugbo nasudlan og balik sa coronavirus disease.

Sa mga niaging adlaw, naa na unta sa 52 ka mga barangay wa na nakatala og kaso, apan tungod sa lima, nisaka ngadto sa 33 ka mga barangay ang adunay Covid-19.

Karon, 47 na lang ka barangay ang wa nay bag-ong aktibong kaso sa Covid-19, sumala sa data nga gihatag ni Konsehal Joel Garganera, deputy chief implementer sa Cebu City Emergency Operations Center (EOC).

Ang upat ka barangay nga naglakip sa Barangay Buot, Taptap, Paril ug Sudlon 1 nagpabiling way kaso sa Covid-19.

Ang dakbayan sa Sugbo adunay 80 ka mga barangay.

Nibalik sad sa 100-mark ang aktibong kaso sa Covid-19 sa dakbayan, diin 108 na sab ang aktibong kaso sa Enero 1.

Anaa na sa 10,842 ang total nga kompirmadong kaso sa Covid-19 sa dakbayan.

Adunay positivity rate nga 8.76 ka porsyento ang dakbayan sa pagkakaron gikan sa 123,698 ka indibidwal nga gipaubos sa testing.

Sa 10,842 nga total nga kaso, 10,044 niini ang naayo

TAPOKTAPOK

Ang social gatherings o pagtapok-tapok usa na sa mga dagkong tinubdan sa pagpanakod sa Covid-19 sa dakbayan sa Sugbo base sa datos nga gihatag sa EOC.

Sa datos sa EOC sa Disyembre 31, 2020, nakuha sa 18.66 nga porsyento sa mga kaso sa Covid-19 sa dakbayan ang pagtakod gikan sa social gatherings.

Sa 14 ka adlaw, gikan sa Disyembre 18 hangtod Disyembre 31, ikaduha ang social gatherings nga rason sa mga pasyente sa Covid-19 nga ilang nakuhaan sa impeksyon.

Ang social gatherings mahug ubos sa outside transmission o transmission sa virus gawas sa panimalay.

Ang outside transmission, sa total, anaa sa 54.08 percent, samtang ang household transmission anaa sa 45.91 percent.

Ang transmisyon sa trabahoan labing dako nga gigikanan sa transmisyon ubos sa outside transmission kon diin anaa sa 37.73 porsyento.

Uban pang tinubdan sa pagpanakod ang inbound travelers nga 9.43 porsyento sa total nga kaso ug mga prisohan nga 5.66 porsyento.