NEGUSYO, di pulitika, ang nag-unang motibo nga gisubay sa kapulisan sa pagpusil patay kang negusyante Ruben Feliciano niadtong Biyernes sa alas pasado sa gabii, Enero 1, 2020.
Si Police Captain Francis Renz Talosig, hepe sa Mabolo Police Station nga nahinabi sa Superbalita Cebu, nibutyag nga tanang anggulo maoy ilang tan-awon, apan usa sa ilang gitutukan kalabot sa negusyo ni Feliciano.
“Dako man gud ni siya nga businessman. So, atong tan-awon kon naa ba siyay nakontra. I-explore nato tanang possibility ani nga motibo,” matod ni Talosig.
Ang nasayran nila ni Talosig nga negusyo ni Feliciano ang port project nga ang buhatan naa sa ra sab sa Lahug.
Buot nilang masayran kon duna bay nihulga kang Feliciano.
Dugang ni Talosig nga kon pulitika, dili nila makonsiderar sa ilang imbestigasyon kay taud-taud na nidagan pagka mayor si Feliciano sa lungsod sa San Fernando.
Si Feliciano gipilde ni Mayor Lakambini “Neneth” Reluya sa eleksyon sa 2019.
“Wala tay ma kuan nga sa politics side. Ang atong gitan-aw karon nga anggulo is business, Kay dugay na man na (pulitika) ug napildi man siya og sa politics side.Wala tay makita ana. Siguro business ni,” dugang ni Feliciano.
PORT PROJECT
Ang port project nga gikalambigitan ni Feliciano mao ang international port unta nga naa sa Sangat San Fernando nga nagbalor og P12.5 bilyunes.
Apan si Feliciano ug usa sa mga investor nagkasungi nga niresulta sa paghawa sa kasusyo.
Ang investor giingong nidala sa tanang mga papelis nga gikinahanglan isip rekisitos sa pagpadayon sa proyekto.
Gikiha usab siya sa investor nga nagbase sa Metro Manila.
Tungod niini, gipahunong ni Mayor Reluya ang proyekto hangtod nga matuman ni Feliciano ang paghatag sa mga rekisitos.
Mao kini ang sinugdanan sa away nila ni Feliciano ug sa mga Reluya.
Nilansar sa pagka mayor si Feliciano batok kang Neneth sa 2019 elections nga init kaayo, apan giparot siya sa incumbent mayor.
Dunay napagya nga kill list sa mga opisyal sa San Fernando, nga naglakip sa mga Reluya ug mga konsehal sa lungsod.
Upat sa mga konsehal nga naa sa listahan gipamatay samtang ang mga Reluya gi-ambush sa Enero 22, 2019 sa may Barangay Linao, Dakbayan sa Talisay samtang nagpadung sa dakbayan sa Sugbo.
Namatay si Konsehal Ricardo “Nonoy” Reluya samtang si Mayor Neneth naangol.
Lakip sa nangamatay mao ang ilang duha ka mga staff sa lungsod.
Si Feliciano nanghimakak nga siya ang utok sa kill list ug nanghimakak usab siya nga duna siyay kalabutan sa mga pagpamatay, labina sa ambush.
“I have nothing to do with that incident. I voluntarily submit myself for investigation. Why link my name?” sulti ni Feliciano sa usa ka press conference dihang siya niduaw sa Cebu Police Provincial Office (CPPO) human sa ambush.
NAGLAKAW
Sila si Feliciano ug iyang pag-umangkon nga si Ken Feliciano gikan ni park sa ilang sakyanan sa may Fulton St. Barangay Apas, Dakbayan sa Sugbo dihang niabot ang usa ka puti nga van nga way plaka nga gisakyan sa gibana-banang lima ka mga tawo.
Duha sa mga sakay nikanaug ug nirakrak kanila ni Feliciano gamit ang tag-as nga mga armas.
Namatay diha-diha si Feliciano sa mga samad sa lawas ug bukton samtang si Ken, 30, naigo sa tiyan ug gidala sa usa ka pribadong tambalanan sa dakbayan.
Si Police Master Sergeant Nicolo Gonzales sa Mabolo Police Station niingon nga wa pa silay nakuhang mga saksi.
Duna say igo lang nakadungog sa mga buto sa armas, apan nagtuo kining mga pabuto sa pagsaulog sa Bag-ong Tuig.
Ang Scene of the Crime Operations team narekober sa lima ka mga kabhang sa bala, pito ka buhing bala ug tulo ka deformed slogs sa gidudahang gikan sa armas nga kalibre .45.
Si Gonzales nidason sa pamahayag ni Talosig nga ang port project maoy gipunting sa ilang imbestigasyon.
“Ang port project maoy opisina aning Feliciano nga dinha nag-abang. Mao pa ni among gilakaw karon aron magkuha og dugang impormasyon,” matod ni Gonzales.
Saysay sa pag-umangkon kang Gonzales nga ang iyang nahibaw-an nga negosyo sa iyang uyoan mao ang port project, apan duna pay laing mga negusyo, wa siyay mga detalye.
Dugang ni Ken nga niadtong Nobiyembre pa lang siya nibalik sa pagmaneho sa iyang uyoan.
Wa siya masayod kon duna ba kini hulga sa kinabuhi.
Dunay kapuyo si Feliciano nga nagdumili sa pag-atubang sa kapulisan ingon sa nahadlok.
Matod ni Gonzales nga hayan dunay nahibaw-an ang kapuyo sa kamatayon sa negusyante.