KAPIN sa P1.3 milyones nga balor sa shabu ang nasakmit sa duha ka managlahi nga pagpangronda sa dakbayan sa Sugbo, Sabado sa gabii, Enero 2.
Ang mga sakop sa Regional Drug Enforcement Unit (RDEU)-7 sa Police Regional Office (PRO) 7 nga gipangulohan ni Police Captain Joffre Grande, team leader sa gihimong anti-illegal drugs operation.
Kuyog usab ang mga ahente sa Philippine Drug Enforcement Agency (PDEA) 7 sa pagpangronda nga miresulta sa pagkasikop sa duha ka mga gikonsidera nga high value individual.
Ang mga nadakpan mao sila si Christopher Babao alyas Moymoy, 35, ug molupyo sa Lower South Hills sa Barangay Tisa. Lakip nga nadakpan si Jeric Delgado, 19, ug molupyo sa Sityo Galilie sa Barangay Duljo Fatima.
Nasakmit atol sa pagpangronda ang gidaghanon sa shabu ang moabot na sa 200 gramos nga mobalor ngadto na sa P1.3 milyones.
Matod ni Grande nga si Babao maoy target sa ronda samtang si Delgado maoy iyang kauban sa paghagbong og mga drugas sa ilang mga kustomer kon kini mahutdan na og pundo sa shabu.
Nahibaw-an usab nga si Babao kanhi na napriso sa susamang kaso sulod na sa tulo ka tuig ug sa milabay lang nga tuig nakagawas sa prisohan human nga naserbisyohan ang giatubang nga kaso niini.
Ang duha ka mga dinakpan wala na motubag dihang sila gipangutana sa ilang pagkalambigit sa pagpamaligya.
Samtang sa lain nga pagronda sa mga operatiba sa Parian Police Station sa Barangay T. Padilla, usa ka electrician ang nadakpan tungod sa pagpamaligya og shabu.
Si Police Lieutenant Freddie Barrientos, deputy station commander sa Parian Police Station, maoy nangulo sa pagronda.
Giila ni Barrientos ang dinakpan nga si Francisco Abella alyas Palong, 43, electrician ug molupyo sa Barangay T. Padilla ning siyudad sa Sugbo.
Nasakmit gikan kang Abella ang shabu gibanabana nga moabot na sa 12 gramos nga mobalor ngadto na sa P81,600.
Sila si Babao ug Abella mag-atubang og kaso nga kalapasan sa pagpamaligya ug paghupot sa mga kontrabando samtang si Delgado mag-atubang og kaso sa paghupot usab og drugas subay sa Akta Republika 9165 o Dangerous Drugs Act of 2002. (BBT)