NANAMILIT ta sa tuig 2020 nga puno sa kagul-anan, kabalaka ug kahingawa gumikan sa pandemiya nga atong gisagubang hangtod karon. Bisan pa man angay gihapon kitang magpasalamat sa Labawng Makagagahum nga gihatagan kita og igong katakus nga makalahutay ug makaabot ning bag-ong tuig. Ang tuig 2020 nagtudlo nato og daghang leksiyon sa kinabuhi nga sa inadlaw natong pakigbisog kinahanglan nga sa kanunay andam kita sa bisan unsa nga pagsulay.
Sa habig sa gobiyerno, dinhi nasukod ang ilang katakus sa pagdumala sa pandemiya nga wala gyud paabota. Sa mga post sa social media, nagkadaiyang kasinatian ang gipaambit. Ang nakadapit sa akong pagtagad mao kadtong naghisgut og mga ayuda.
Kinsa bay makalimot sa ayuda nga hilabihang taasa sa linya. Dili na kinahanglan pang i-isplikar nganong naabot sa punto nga daghan ang nagbagulbul. Pero sa mga may maaghop og kasingkasing nga nitunol og tabang sa mga nanginahanglan, dili gyud mo makalimtan. Dinhi lang sa atong Asoy nagbaha sab ang mga hinabang nga ilang gipaabot sa mga nanginahanglan.
Kinsay makalimot niadtong mga construction worker nga natanggong sa ilang gitrabaho nga apartment. Tungod sa lockdown wala na sila tuguti nga makapauli. Salamat kay may ayuda nidangat. Bisan ginagmay bintaha nalang kay sa wala. Kadtong usa ka sakong bugas humay nga gitunol sa usa ka pamilya nga may siyam ka anak diha sa Inayawan. Kinsay magtuo nga human nila mabasahi ang atong asoy, may manggiloy-on nga taga Mandaue ang nisanong sa ilang panginahanglan.
Apan, ang mas nakapadani sa akong pagtagad kay ang gitagaan og usa ka sakong bugas nanawag nako ug nananghid nga mahimo ba daw nga manghatag sab siya sa iyang mga silingan nga sama niya nagsigi nalang og lugaw. Dia pay lain. May taga Barangay Duljo nga nanawag kay ang iyang bugas nga gitagana sa makaloluoy nga molupyo sa Inayawan nibalibad. Ang rason kay bag-o lang nakadawat og pinansiyal nga ayuda sa gobiyerno. Ipahatag nalang sa lain nga nanginahanglan ang para sa iyaha.
Pagka nindot paminawon ang maong sugilanon.
Naa pa gyuy mga tawo nga naghunahuna para sa uban inay ilang kaugalingon ray busgon sa mga ayuda. Pagpaambit sa grasya panahon sa pandemya. Usa sa labing importante nga kasinatian nga akong nakita sa miaging tuig. Sama niadtong pulis nga tag-iya og refilling station. Pag-lockdown sa sitio Zapatera sa Barangay Luz, Cebu City, mga hinabang nangabot. Usa na ang maong pulis ang nihatod og subra sa usa ka gatos nga ginalong tubig mainom. Kini og daghan pa nga wala gani magpaila ang mga donor. Way picture, way selfie.
kay alang nila ang nagkutoy nga tiyan ang importante. Tinuod kanang naa sa imong hunahuna. Duna pay daghan ang wa makadawat labi na sa mga ayuda nga gikan sa gobiyerno.
May niduol nako og nagpaila. Mga trabahante sila sa tambalanan nga nanawat og mga pasyente nga gi-Covid. Subo lang palandungon kay nakalimtan nga sila mga frontliner sab nga wala mag-uniporme og puti. Ngano man? Kay ang ilang trabaho mao ang pagsiguro nga moandar ang mga ekipo sa tambalanan. Apil na ang supply sa kuryente ug tubig. Dili diay sila maisip nga frontliner?
Ang nagbantay sa mga botika nga bisan sa panahon sa lockdown padayong ni-report sa trabaho. Pangutan-a sila kon nabahinan ba sa mga ayudang pinansiyal nga unta naapiki man ang panueldo tungod kay di man kompleto ang tibuok kinsenas ang ilang trabaho. Ang mga taxi, jeepney ug tricycle driver hilabihan ka makaloluoy.
Ning bag-ong tuig padayon ang atong pakigbisog. Apan di gihapon kita mokompiyansa. Ang mga gipatuman nga balaod paglikay sa makamatay nga virus maoy prayoridad sa tanan. Uban ang pag-ampo nga unta matapos na kining tanang pag-antos.