GILUSAD ang managlahing imbestigasyon bahin sa pagbakuna sa mga sakop sa Presidential Security Group (PSG) batok sa Covid-19 ginamit ang bakuna gikan sa China nga wa pa maaprobahing gamiton dinhi sa Pilipinas.
Imbestigahon sa Food and Drug Administration (FDA), Bureau of Customs ug sa Armed Forces of the Philippines (AFP) mismo kon giunsa pagpalusot ang bakuna dinhi sa Pilipinas ug giunsa pagbakuna ang mga sakop sa PSG, ang close-in security detail sa presidente.
Niapil sab ang Senado. Ilang ipatawag si PSG commander Brig. Jesus Durante III atubangan sa Senado isip committee of the whole aron masayran kon giunsa nila pagkuha ang bakuna gikan sa Chinese pharmaceutical company nga Sinopharm.
Apan alang kang Senador Ronald “Bato” dela Rosa, imbis nga imbestigahon ang mga sakop sa PSG, angay silang pasalamatan kay gibutang nila sa risgo ang ilang kinabuhi isip mga “guinea pigs” sa bakuna gikan sa China aron proteksyonan ang presidente gikan sa Covid-19.
Matod ni Senador Bato, di na kini angay nga himuong isyu kay personal ang ilang desisyon nga magpabakuna. Kon di epektibo, sila maoy alaot. Apan kon epektibo, silay mabulahan. Mapanalipdan sab ang presidente. Kamo bay eksperimentohan, lalim ba.
Duna man guy nangreklamo nga unahon ang frontliners ug kadtong labing vulnerable sa coronavirus disease. Apan wa pa man kaaprobahi kining bakuna gikan sa China. Pangutan-a una sila kon magpabakuna ba sila niining wa pa aprobahin sa FDA.
Angay nga tubagon sa FDA ang kalangay sa pag-aprobar sa mga bakuna batok sa Covid-19. Nganong giaprobahan man ni sa mga nasod nga dunay mas mga modernong facilities sama sa United States, United Kingdon ug sa Europe apan wa maaprobahi dinhi sa ato?
Nganong ang ubang mga nasod nagbakuna na man sa ilang katawhan unya kita wa pa man? Ang tubag mao nga mag-una gyud ang mga nasod nga adonahan. Wa pa gani maaprobahi ang bakuna.