NINDOT man diay ang live-action film nga Mulan. Niadto pa ning Oktubre nako napalit ang DVD apan niadto lang Bag-ong Tuig nako nalugaran og tan-aw.
Sakto sad kaayo ang tema sa iyang estorya nga bahin sa pamilya nga maoy sentro sa atong pagselebrar sa Bag-ong Tuig.
Pipila sa mga di nako malimtang linya sa maong pelikula mao ang gisulti sa ilang emperor nga “devotion to family is an essential virtue” ug ang espadang dunay tatak nga “Loyal. Brave. And True.”
Ang estorya nagsugod gikan sa pagkabata ni Mulan hangtod nga niboluntaryo ni sa imperial army sa Tsina sanglit sayod siya nga dili na makaya sa iyang masakitong amahan nga kanhi sundawo kon mao pa ni mobalik sa panggubatan.
Ang emperor nihimog kamandoan nga ang kada-pamilya kinahanglang mohatag og volunteer nga lalaki aron himuong army nga maoy makigbatok sa mga Rouran warrior nga gustong mosakop sa ilang lugar. Sanglit puros sila babayeng anak sa iyang amahan mao nga napugos siyang magtakuban nga lalaki.
Si Mulan duna say gitagoang talagsaon nga gahum nga maoy nikontra sa black magic sa bruhang si Xianning. Nindot ang iyang visual labi na ang mga fight scene nga tugob sa kulbahinam ug aksyon.
Maayo sad ang bidang si Liu Yifel sa title role nga Mulan ug ang supporting cast nga naglakip nilang Jet Li ug Donnie Yen (nga nisikat sa pelikulang IP Man). Kon wa pa mo kakita tan-aw jud dayon.
PABOTO
Daghan man gihapon ang nagpaboto sa pagsugat sa Bag-ong Tuig. Mora mag way Covid. Daghan gihapon ang nag-display og prutas sa lamesa. Morag way krisis.
Hinuon dili ra ingon ana kadugay ang mga paboto pero wala ra ni maglagyo kon ikumparar sa miaging tuig. Tradisyon na man gud mao nga lisud na gyud ning wagtangon sa mga Pinoy.
Kaluoy sa Ginoo wala ra man hinuon motaas ang kaso sa Covid. Ang nitaas hinuon ang contribution sa SSS ug PhilHealth. Kapait.
Unya sa false survey ra ba, este Pulse survey, mao gihapong mga pangana ang nag-una gawas ni Isko Moreno nga so far, so good.
BIRTHDAY GIRL
Daghana diay namong mag-birthday karong buwan sa Enero. Nag-una sa listahan siyempre si Ma’am Josie S. Pereyra sa JSP Ads and Promo nga bisan lisud kaayo karon ang entertainment apan wa gyud mawa niya ang pagka-generous sa mga nanginahanglan.
I’m wishing you longevity and good health always, Ma’am. Thank you for being a blessing to the industry. Happy Birthday!