HUMAN sa duha ka semana na nga pagkyas nga pagpangita sa mga minero nga biktima sa landslide sa Carmen Pit sa Carmen Copper Corporation (CCC) sa dakbayan sa Toledo, motikang na sa laing lakang ang mga rescuer.
Ila nang ipahigayon ang “dewatering” o ang pagpahubas sa tubig nga himuon sa rescue team pinangulohan sa CCC.
Kini maoy gibutyag ni Roseller Layan, information officer sa Kagamhanan sa Dakbayan sa Toledo.
“Continue gihapon ang atong search and retrieval kay directive man ni Mayor nga Saturday ug Sunday dili gyud ipahunong dayon. Karon wala pa gyud tawn nakit-an. Pero nag start ta og dewatering. Ato pahubsan ang tubig katong dapit sa na landslide,” matod ni Layan.
Disyembre 28 unang gibutyag ni Layan nga migamit na ang rescue team og sonar devices ug K9 dogs subay sa paglaom sa kagamhanan nga makita pa ang mga lawas sa mga biktima.
Nagpabilin nga missing mao sila si Jose B. Carpentero, Jonwel S. Herediano, Simeon B. Laconas, John Paul L. Resuelo, Renante F. Sepada, ug Alfred C. Tautho.
Dugang ni Layan nga sa kasamtangan nagpadayon gihapon ang search and retrieval operation sa yuta nga nahunlak.
Nagpadayon usab ang imbestigasyon sa Mines and Geosciences Bureau (MGB) kabahin sa nahitabo.
Sa Enero 6, gilaoman nga may dugang grupo nga i-padala ang MGB nga mo survey sa operasyon ug sa minahan alang sa nagpadayon nga imbestigasyon.
Gipahibaw usab sa kagamhanan nga nakapada na usab og pagkaon ang syudad sa 400 ka mga pamilya nga apektado sa pagdahili sa yuta sa lugar.
“Of course mo resist gyud ang uban kay dili man namo mahatag ang convenience nga mahatag sa kaugalingon nila nga panimalay. Naa sad mi financial assistance sa mga namatyan at the same time naa sad tay food packs nga nahatag ug evacuation tents,” matod ni Layan.
Sa dayon nang tapos sa Disyembre, ang 400 ka mga pamilya gipbakwit sa Siyudad kay nasulod sila sa 600 metros nga radius sa Carmen Pitnga kuyaw kon mag landslide.