BISAN pa man sa pagpahigayon og “unorthodox, unconventional, and innovative” nga Sinulog, dakong hagit kining maong kalihokan alang sa Sugbo. Dili lang kini hagit sa mga organizer.
Hangtod karon man gud, wala pay bakuna ang naabot sa Pilipinas gawas sa smuggled nga gigamit alang sa Presidential Security Group (PSG) aron lang masiguro ang panglawas sa Presidente.
Bahala na bisan ang 16 milyones nga namotar kang Presidente Rodrigo Duterte nga maulahi. Hulat sa Sinovac, ang bakuna sa Insek. Matod pa, sinovac nag-smuggle? Hehe.
Karon, duna pa gyud kitay gikahadlokan nga bag-ong strain sa coronavirus nga mas paspas makatakod.
Basi sa planong walay live audience kay mag-online, di magtapok ang minilyon sa kadalanan. Limitado sab 50 ang mga sakop sa mga contingent nga anha mag-perform sa SRP.
Apan, alang sa populasyon nga naanad nga manggawas ug maglaag-laag, dakong hagit ang magpuyo lang sa balay ug magtan-aw sa mga performance online.
Hinuon, sulod sa katuigan, nagkaanam kadaghan ang dili na manan-aw sa pasundayag kay anha na magtapok sa kabalayan. Hagit sab ang pagsiguro nga masunod ang mga health protocols.
Kini ra bang atong kagamhanan kay mas naanad sa pag-isyo og mga mando nga gamay ra ang nakahibawo ug ipakanaog og mga pulis diin pipila ang di makamao mobadlong sa mga tawo.
Alang kanako, dako kaayo ang papel sa pagpakatap sa mga impormasyon sulod lang sa tulo ka semana labi na nga daghan kaayo ang kabag-ohan.
Nakahibawo kita niini kay mas aktibong nisuporta baya kita kaniadtong Sinulog 2018 ug 2019 kabahin sa public relations. Ug niadtong tungora nga walay pandemya, nagsugod kita sa atong preparasyon sa Oktubre pa sa miaging tuig.
Contingent
Dayon, lahi pa gyud nga atemanon ang safety protocol sa mga praktis ug actual performance na. Bisan pag walay dakong audience, moabot baya og 50 ang performers matag contingent. Wa pa kita makahibalo kon pila ka mga contingent. Dayon, naa pa ang mga technical nga suporta sa programa. Nisamot akong kabalaka kay atong nasayran gikan sa lindog ni Bobby Nalzaro nga kinahanglan pang mag-coordinate ang mga organizer sa EOC ug kapulisan.
Makasiguro ba ang mga organizer nga di magtinakdanay ang mga performers?@anol_cebu sa Twitter