TUIG 2021 na. Happy New Year! Maglipay ug magpasalamat ta sa atong Ginoong Diyos, nga bisan sa kalisdanan nga atong nasugatan sa tuig 2020 sa pagdagsang sa Covid-19, ang makalilisang nga sakit nga daghan ang natakdan ug namatay sa tibuok kalibutan, nia gihapon ta nagkisaykisay ug naningkamot aron motubo ug molambo. Manghinaut ta nga ning tuig 2021, bisan pa sa mga tidlum nga panagna, nga hatagan ta sa maayong panglawas ug maluwas na ta sa Covid-19.

Matag Enero, ang Dakbayan sa Sugbo ug kalungsoran sa lalawigan, magsaulog sa Pista Senyor agi’g pagpasidungog sa atong patron Señor Sto. Niño. Bisan pa sa pandemya sa Covid-19 ang Simbahang Katoliko magsaulog gihapon sa Pista Señor apan dunay mga naandan nga kalihokan nga gikansilar aron pagtuman sa kamandoan sa atong kagamhanan nasyonal aron paglikay sa takod aning corona virus.

Ang mga kalihokan nga gikanselar sa Simbahan Katoliko sa pagselebrar sa Pista Señor mao ni: “the Penitential Walk with Jesus”, “the Penitential Walk with Mary”, “the Traslacion”, ang pagbalhin sa imahen ni Sto. Niño gikan sa Cebu City ngadto sa National Shrine of St. Joseph sa Mandaue City ug hangtud sa Lapu-Lapu City, ang “Seaborne Procession”, “the First Baptism Reenactment” ug tiniil nga prosesyon gikan sa Simbahan subay sa naandan nga rota sa dakbayan sa Sugbo ug balik sa Simbahan.

Apan daghan ang nahingangha ug nakurat, lakip na ang uban nga opisyales sa dakbayan sa Sugbo, sa desisyon sa kadagkuan sa Sinulog Foundation, Inc. (SFI), nga gipangulohan ni Vice Mayor Mike Rama, sa pagpahigayon sa tinuig nga indigay sa sayaw-Sinulog agi’g pagsadya ug pagsaulog sa kapistahan ni Patron Señor Sto. Niño. Matud pa ni Rama ang pagsaulog sa Sinulog karon lahi sa naandan sa nangagi nga tuig tungod sa pandemya sa Covid-19. Di na diay mopahibawo si bise mayor sa iyang mga kauban nga opisyales?

Ang Simbahan Katoliko, nga independente sa kagamhanan tungod sa prinsipyo nga panagbulag, mituman man gani sa health protocols kay ang nobenaryo sa pista ipagawas nga buhi sa You Tube ug Facebook. Limitado ra usab ang makatambong sa misa nga kinahanglan magsul-ob sa face mask ug face shield ug ipatuman ang social distancing. Ang way quarantine pass di makasulod sa simbahan.

Ang mga mosalmot sa Sinulog sa indigay sa sayaw, nga atong nahibaw-an ug naandan, mosubay sa rota nga magsayaw sa dalan padulong sa City Sports diin didto ang katapusan nga pasundayag ug paghusga. Sa ato pa, bisan og walay motan-aw sa Sinulog kay adto man sa SRP kuno ang kumpetisyon ipahigayon matu pa ni Vice Mayor Rama apan ang mosalmot sa sayaw dili man moubos sa 20 ka tawo. Unsay kasiguroan sa mga mosalmot sa indigay sa sayaw-Sinulog, nga ang usa o duha kanila walay coronavirus?