NEGOSYO o business angle ug dili personal o pulitika ang gitutukan sa kapulisan sa pagpusil patay sa negosyanteng si Ruben Feliciano sa wala mailhing armadong mga tawo niadtong Bag-ong Tuig, Enero 1, sa gabii sa Fulton St., Lahug, Dakbayan sa Sugbo. Naglakaw paingon sa iyang gipuy-an si Feliciano kauban sa iyang pag-umangkon nga si Ken sa dihang gipaarakan sila sa mga mamumuno nga nakasakay sa puting van. Patay diha-diha si Feliciano sa daghang mga samad pinusilan. Samtang samdan ang iyang pag-umangkon ug anaa karon nagpaalim sa tambalanan.
Kon negosyo ang anggulo, unsay negusyo niya? Wala kaayoy nakaila kaniya sa San Fernando kay matod pa sa atong mga tinubdan nga mikalit lang kini og butho sa maong lungsod gikan sa Mindanao. Taga Zamboanga City kuno siya og kagikan. Daghan tuod nang apelyadoha didto. Taga didto pod ko.
Mitumaw ang ngalan ni Feliciano sa San Farnando sa dihang mibutyag siya pinaagi sa media nga mobubo og puhunan nga P12.5 billion aron iugmad og negosyo sa lungsod pinaagi sa First Sangat San Fernando international Port Investment. Iyang ugmaron ang gamay’ng pantalan ug ship repair facility sa lungsod. Hinuon, dili iyang personal nga kapital ang iyang ibubo. Apan wala aprobahi ang multi-billion project ni Mayor Lakambini “Neneth” Reluya hinungdan nga iyang gikiha ang mayor ug ang bana niini nga si kanhi Panadtaran barangay captain ug ABC president Ricardo “Nonoy” Reluya.
Sa dihang nagsingabot na ang 2019 elections, nibutyag si Feliciano nga molansar sa pagka-mayor atbang ni Reluya.
Nanghambog pa siya nga iyang puohon ang mga opisyal sa lungsod nga nahilambigit sa kurapsiyon ug illegal nga drugas. Ug mipagawas pa siya og “kill list” sa mga patyonon. Tuod man dihay gyuy misteryosong gipamatay nga mga konsehal sa lungsod ug barangay. Nagtukma ra ba sa iyang lista.
Niadtong Enero 22, 2019, gibanhigan sila si Mayor Reluya ug iyang bana sa Linao, Talisay diin namatay ang iyang bana ug staff. Wala hinuoy ebidensiya nga si Feliciano ang nagpaluyo, apan gidudahan. Wa kahay kalabutan ang personal ug pulitika sa kamatayon ni Feliciano? Dili kaha ni bawos na? Nangutana lang ko.